Toshkent, O‘zbekiston (UzDaily.uz) — Respublika fond birjasi “Toshkent” Amerikadagi NASDAQ birjasi delegatsiyasini qabul qildi.

Uchrashuvda “Toshkent” RFB Kuzatuv kengashi raisi Nodirbek Xusanov, boshqaruv raisi Georgiy Paresishvili, boshqaruv raisining birinchi o‘rinbosari Zafar Samatov, NASDAQ kompaniyasining ijroiya vitse-prezidenti Edvard Nayt hamda moliyaviy texnologiyalar direktori Dmitriy Zelensov ishtirok etdilar.

Muzokaralar chog‘ida tomonlar strategik hamkorlik istiqbollarini muhokama qilib, birja infratuzilmasi va texnologiyalarini modernizatsiya qilish, xususiylashtirish jarayonlarida ishtirok etish, shuningdek, o‘zbek emitentlarining har ikki mamlakat birjalarida ikki tomonlama listing imkoniyatlari borasida fikr almashdilar.

Uchrashuv yakunida Georgiy Paresishvili tajriba almashish va ilg‘or yondashuvlarni joriy etish milliy fond bozorini yana-da rivojlantirishda muhim ahamiyat kasb etishini taʼkidladi. Uning so‘zlariga ko‘ra, NASDAQ vakillarining tashrifi xalqaro hamkorlikni mustahkamlash va “Toshkent” RFBning investitsiyaviy jozibadorligini oshirish yo‘lidagi muhim qadam bo‘ldi.