Toshkent, O‘zbekiston (UzDaily.uz) — Namangan viloyatida Davlat xavfsizlik xizmati xodimlari ichki ishlar organlari bilan hamkorlikda «Islom davlati» terrorchilik tashkiloti faoliyatida ishtirok etganlikda gumon qilingan 21 nafar shaxsni qo‘lga oldi, deya xabar berdi DXX matbuot xizmati.

Tergov maʼlumotlariga ko‘ra, guruh rahbari Pop tumani Yangiobod mahallasida yashovchi ayol bo‘lib, u ijtimoiy tarmoqlarda ISHID g‘oyalarini qo‘llab-quvvatlovchi targ‘ibot materiallarini tarqatish uchun yopiq kanallar tuzgan.

Tekshiruv jarayonida aniqlanishicha, u internet orqali Janubiy Koreyada mavsumiy ishlab yurgan Farg‘ona viloyatilik yigit bilan tanishgan. Uning taʼsirida qiz terrorchilik tashkilotlari faoliyatiga aralashgan. Ular o‘zaro nikoh qigan va jangovar hududlarga “hijrat” qilishni rejalashtirgan.

Bundan tashqari, guruh rahbariga yaqin qarindoshi va qo‘shnisi ham noqonuniy faoliyatga jalb etilgan. Tergov versiyasiga ko‘ra, ular ham ijtimoiy tarmoqlarda yopiq kanallar ochib, u yerga qarindoshlar, qo‘shnilar va ekstremizmga moyil shaxslarni jalb etgan, qatl va jangovar harakatlar sahnalari namoyish etgan hamda hokimiyatni zo‘ravonlik yo‘li bilan ag‘darishga chaqiruvchi materiallar tarqatgan.

Qo‘lga olingan qizlardan biri o‘z ko‘rsatuvida Telegram orqali zo‘ravonlik aks etgan videolar va terrorchilar qo‘llanmalarini tarqatganini aytdi. U Misrga “hijrat” qilib, taʼlim olish va jihodda ishtirok etish niyati bo‘lganini, ammo qilgan ishidan afsusda ekanini va kelgusida ekstremizmdan voz kechib, ijtimoiy tarmoqlarni oila va jamiyat manfaati uchun foydalanishini bildirdi.

DXX maʼlumotiga ko‘ra, ushbu shaxslar avval ham bir necha bor ularning xatti-harakatlari mumkin emasligi haqida ogohlantirilgan, ammo shunga qaramay yashirin faoliyatni davom ettirgan. Tezkor tadbirlar davomida ulardan diniy adabiyotlar, elektron nosirlar va boshqa dalillar musodara qilindi.

Guruhning to‘rt rahbariga nisbatan Jinoyat kodeksining 244−1-moddasi (jamoat xavfsizligiga tahdid soluvchi materiallarni tayyorlash, saqlash va tarqatish) va 244−2-moddasi (dindor-ekstremistik tashkilotlarni tuzish, ularga rahbarlik qilish va ishtirok etish) bo‘yicha jinoyat ishi qo‘zg‘atildi.

Shulardan ikki nafari qamoqqa olingan, qolgan 17 nafar shaxsga nisbatan surishtiruv ishlari olib borilmoqda.