Namangan viloyatida Arashan ko‘li atrofida 1 million sayyohga mo‘ljallangan turistik majmua barpo etiladi

Toshkent, O‘zbekiston (UzDaily.uz) — Namangan viloyatida yirik turistik loyiha – Arashon ko‘li atrofida yangi majmua qurilishi rejalashtirilgan. Bu haqda O‘zbekiston Prezidenti Shavkat Mirziyoyev hududning ijtimoiy-iqtisodiy rivojlanishiga bag‘ishlangan yig‘ilishda maʼlum qildi.

Davlat rahbarining taʼkidlashicha, turistik majmua Pop tumani hududida 1 200 gektar maydonda joylashtiriladi va yiliga bir milliongacha sayyohni qabul qilish imkoniyatiga ega bo‘ladi.

Prezident shuningdek, turizm sohasida yirik loyihalarni amalga oshirish uchun zarur bo‘lgan malakali kadrlarni tayyorlash maqsadida yangi o‘quv yilidan Namangan davlat universitetida Avstriyaning Krems universiteti bilan hamkorlikda qo‘shma fakultet ochilishini alohida qayd etdi.