Moskvada oʻzbek ishlab chiqaruvchilari uchun "Sadovod" savdo maydonchasi ochildi

Toshkent, O‘zbekiston (UzDaily.uz) — Moskva shahrida Rossiyaning eng yirik savdo majmualaridan biri - "Sadovod"da o‘zbekistonlik ishlab chiqaruvchilar uchun savdo maydonchasining rasmiy ochilish marosimi bo‘lib o‘tdi.

Loyiha O‘zbekiston Respublikasi Investitsiyalar, sanoat va savdo vazirligi hamda Yengil sanoatni rivojlantirish agentligi ko‘magida milliy brendlarni Rossiya bozorida ilgari surish maqsadida amalga oshirildi. Tadbirda Agentlik direktori Nozim Xolmuradov va ISSV departamenti rahbari Inomjon Abdurahmonov ishtirok etdilar.

Tekstil, oyoq-kiyim va tikuvchilik sohasidagi mahalliy korxonalar uchun savdo shoxobchalari va ombor joylari markazlashtirilgan tarzda ijaraga olindi. Maydonda 38 ta savdo nuqtasi faoliyat yuritmoqda, unda o‘zbekistonlik kompaniyalar kiyim-kechak, oyoq-kiyim, uy to‘qimachiligi va aksessuarlar kabi mahsulotlarini faol namoyish etmoqda.

Yangi savdo maydonchasi to‘g‘ridan-to‘g‘ri savdolarni yo‘lga qo‘yish, rossiyalik hamkorlar bilan shartnomalar tuzish va milliy brendlarimizning mamlakatdagi eng yirik iste’mol bozorida o‘z mavqeini mustahkamlash uchun keng imkoniyatlar yaratadi.