Toshkent, O‘zbekiston (UzDaily.uz) — Uzbekistan Airports kompaniyasi Mo‘g‘ilistonning Hunnu Air aviakompaniyasi bilan muzokaralar o‘tkazib, havo transporti sohasidagi hamkorlik istiqbollarini muhokama qildi.

Uchrashuv davomida tomonlar Toshkent va Ulan-Bator o‘rtasida to‘g‘ridan-to‘g‘ri muntazam yo‘lovchi parvozlarini ochish imkoniyatini ko‘rib chiqdilar.

Hunnu Air ushbu yo‘nalishni 2025 yilning ikkinchi yarmidan boshlab amalga oshirishni rejalashtirmoqda. Dastlabki maʼlumotlarga ko‘ra, parvozlar Embraer 190 havo kemalarida bajariladi.

Hunnu Air — 2011 yilda tashkil etilgan xususiy Mo‘g‘iliston aviakompaniyasi. Uning bosh ofisi Ulan-Batorda joylashgan bo‘lib, asosiy aviaxabi Chingizxon xalqaro aeroportida joylashgan. Kompaniya ichki va xalqaro parvozlarni amalga oshiradi, aviaparki ATR 72-500 va Embraer 190 samolyotlaridan iborat.