Mirziyoyev turizmni strategik rivojlantirish bo‘yicha qarorni imzoladi

Toshkent, O‘zbekiston (UzDaily.uz) — O‘zbekiston Prezidenti Shavkat Mirziyoyev «Turizm qo‘mitasi faoliyatini tashkil etish va turizm sohasini jadal rivojlantirish chora-tadbirlari to‘g‘risida»gi qarorni imzoladi. Hujjat mamlakat turistik sohasini 2030 yilgacha tizimli rivojlantirish bo‘yicha strategik ustuvor yo‘nalishlar va aniq qadamlarni belgilaydi.

Qaror bilan Turizm qo‘mitasi normativ-huquqiy hujjatlarni ishlab chiqish, byudjet resurslarini boshqarish va xalqaro faoliyatni muvofiqlashtirish kabi vakolatlarga ega bo‘lgan respublika ijro etuvchi hokimiyat organi sifatida tashkil etilishi belgilab qo‘yilgan.

Hujjatning asosiy maqsadlari qatorida turizmning YAIMdagi ulushini 3,5 foizdan 7 foizga oshirish, yiliga xorijiy turistlar sonini 10 milliondan 20 millionga yetkazish, jumladan, yuqori to‘lov qobiliyatiga ega turistlar ulushini ko‘paytirish, shuningdek, turistik xizmatlar eksporti hajmini 6 milliard dollardan ortiq darajaga yetkazish belgilangan.

Alohida eʼtibor transport logistikasini takomillashtirish, ichki aviyayo‘nalishlar sonini ko‘paytirish va yo‘ldagi vaqtni kamida uch barobar qisqartirish, 4 va 5 yulduzli mehmonxonalar sonini ikki barobar oshirish, turistik mahsulotlarni diversifikatsiya qilish va O‘zbekistonning jahon miqyosida taniluvchi brendini shakllantirishga qaratilgan.

Rivojlantirishning ustuvor yo‘nalishlari qatorida tarixiy-madaniy turizm va infrastruktura alohida o‘rin tutadi.

Keng qamrovli loyihalar qatoriga Samarqandning asosiy tarixiy obyektlarini bog‘lovchi 6,6 kilometrlik «Samarqand merosi yo‘li» turizm marshrutini yaratish, Xivadagi “Ichan-Qalʼa” majmuasini shahar muhiti va tarixiy inshootlar uyg‘unligini taʼminlagan holda o‘ziga xos immersiv “aqlli” muzey-shaharga aylantirish, Toshkentda modernizm yodgorliklarini xalqaro darajada targ‘ib qilish va poytaxtni «mozaikalar shahri» sifatida tanitish kiradi.

Qaror turizm sohasini qo‘llab-quvvatlash bo‘yicha keng chora-tadbirlarni nazarda tutadi: xorijiy turistlar va kamida 100 nafar chet el ishtirokchisini jalb etuvchi tadbirlarga turistlarni jalb qilgan turoperatorlarga QQSni qaytarish, turistik startap va innovatsion loyihalarni 50 foizgacha subsidiyalash, yangi xizmat turlarini joriy etishni rag‘batlantirish, xalqaro “yashil” sertifikatga ega mehmonxonalar uchun moliyaviy imtiyozlar, shuningdek, Brand Finance reytingining top-50iga kirgan xalqaro brendlar ostidagi mehmonxonalar qurishda uskuna, texnika va mebelni bojxona bojidan ozod qilish.

2026 yil 1 iyuldan yagona milliy turizm platformasi va mobil ilovasini ishga tushirish rejalashtirilgan. Undan turistlar elektron SIM-kartani ishlatish, vaqtinchalik ro‘yxatdan o‘tish, onlayn chipta bron qilish va barcha turistik obyektlar uchun «yagona chipta» tizimidan foydalanish imkoniga ega bo‘ladi.

Platforma interaktiv xaritalar, audio va video yordamchiga ega raqamli gidni, shuningdek, yo‘nalishlarni personallashtirish va turistik oqimlarni bashorat qilish uchun katta maʼlumotlar va sunʼiy intellekt asosidagi analitik vositalarni taklif etadi. Tizim «Xavfsiz shahar» platformasi bilan integratsiya qilinadi.

Jahon turistik tashkiloti homiyligidagi Xalqaro turizm akademiyasining Samarqand kamusida turistik soha xodimlari uchun bir oygacha qisqa kurslar va sakkiz oygacha qayta tayyorlash dasturlari tashkil etiladi.

Investitsiyalar, sanoat va savdo vazirligiga Turizm qo‘mitasi va mahalliy davlat hokimiyati organlari bilan hamkorlikda mamlakat savdo-ko‘ngilochar majmualariga jahonning mashhur kiyim-kechak brendlarini jalb etish va shahar chetlarida milliy meʼmoriy uslub asosida zamonaviy autlet-markazlar barpo etish topshirilgan. Amaliylashtirish ikki bosqichda belgilangan: 2030 yilgacha — Toshkent, Samarqand, Buxoro va Xivada; 2030 yildan keyin — turistik salohiyati yuqori bo‘lgan boshqa nuqtalarda.

Qaror ijrosini nazorat qilish uchun Prezident Administratsiyasi qoshidagi Kreativ iqtisodiyot va turizm departamenti huzurida Islohotlar shtabi tashkil etildi. Turizm qo‘mitasi raisi hujjat ijrosining samaradorligi uchun shaxsan javobgar hisoblanadi. Turizmni qo‘llab-quvvatlash jamg‘armasi xarajatlarini optimallashtirish va moliyalashtirilayotgan loyihalar samaradorligini muntazam baholash choralari ham nazarda tutilgan.