Mirziyoyev O‘zbekiston davlat organlari va korxonalarida 53 trln so‘mlik talon-torojliklar aniqlanganini maʼlum qildi

Toshkent, O‘zbekiston (UzDaily.uz) — O‘zbekiston Prezidenti Shavkat Mirziyoyev 27 yanvar kuni bo‘lib o‘tgan yig‘ilishda mamlakat davlat organlari va korxonalarida 53 trln so‘m miqdoridagi keng ko‘lamli talon-torojlik va moliyaviy qonunbuzarliklar aniqlanganini maʼlum qildi. Shu bilan birga, fosh etilgan korrupsiyaviy sxemalar natijasida yetkazilgan zarar 4,2 trln so‘mni tashkil etgan.

«Bilib qo‘yinglar, davlatning har bir so‘mi bo‘yicha taʼsirchan nazorat o‘rnatiladi. Javobgarlik muqarrar, jazo qattiq bo‘ladi!», — deya taʼkidladi davlat rahbari.

Uning taʼkidlashicha, so‘nggi paytlarda Prezident administratsiyasi va boshqa davlat organlarida joriy etilgan komplayens va korrupsiyaga qarshi nazorat tizimi byudjet tushumlari, talon-torojlik va moliyaviy suiisteʼmolliklar bo‘yicha 53 trln so‘mga teng jiddiy qonunbuzarliklarni, shuningdek tashqi savdo operatsiyalari bo‘yicha 8 mlrd dollardan ortiq qarzdorlikni aniqlash imkonini berdi.

Prezident so‘zlariga ko‘ra, korrupsiyaviy sxemalarga qarshi kurash doirasida hozirga qadar 1,3 trln so‘m undirib olingan, aniqlangan holatlar bo‘yicha esa 55 nafar shaxs qo‘lga olingan.

U misol tariqasida Ichki ishlar vazirligi tizimidagi holatni keltirib o‘tdi, unda davlat xaridlari jarayonida 186 mlrd so‘m byudjet mablag‘lari o‘zlashtirib olingan.

Shu munosabat bilan Ichki ishlar vazirining sobiq o‘rinbosari, Jamoat xavfsizligi departamenti boshlig‘i general-mayor Bekmurod Abdullayev hamda Jazoni ijro etish departamentining sobiq boshlig‘i Rustam Tursunovga nisbatan jinoyat ishi qo‘zg‘atilgan.

Prezident davlat organlari va korxonalarida xavfsizlik uchun masʼul bo‘lgan mansabdor shaxslar faoliyatini tanqidiy qayta ko‘rib chiqish zarurligini taʼkidladi.

Shuningdek, u rahbar kadrlarning yosh tarkibi bilan bog‘liq muammoga eʼtibor qaratdi. Huquqni muhofaza qilish tizimida xizmat qilish uchun belgilangan eng yuqori yosh — polkovniklar uchun 55 yosh, generallar uchun 60 yosh bo‘lishiga qaramasdan, ushbu yoshdan oshgan 300 nafardan ortiq xodim hali ham rahbar lavozimlarda ishlab kelayotgani qayd etildi.

Ayni paytda Favqulodda vaziyatlar vazirligi tizimida barcha rahbar kadrlar 50 yoshdan kichik ekani taʼkidlandi.

«Bizga yuqori kasbiy kompetensiyalarga ega, talabchan yosh rahbarlar korpusi kerak», — dedi Shavkat Mirziyoyev.

Rahbarlikka yosh kadrlarni qo‘yish, pensiya yoshidagilarning tajribasidan murabbiy va o‘qituvchi sifatida foydalanish yoki mahallada yoshlarga ustozlik qiladigan tizim yaratish muhimligi qayd etildi.