Toshkent, O‘zbekiston (UzDaily.uz) — 

‘zbekiston Prezidenti Shavkat Mirziyoyev 2026 yil mart oyida Jizzax viloyatida atom elektr stansiyasi qurilishida birinchi beton quyish ishlarini boshlashni topshirdi. Bu haqda “O‘zatom” atom energiyasi agentligi direktori Azim Axmedxadjayev O‘zbekiston 24 telekanaliga bergan intervyusida maʼlum qildi.

Uning so‘zlariga ko‘ra, poytaxtni energiya bilan taʼminlash masalalariga bag‘ishlangan yaqindagi yig‘ilishda davlat rahbari AES loyihasi ijrosiga alohida eʼtibor qaratdi. Mirziyoyev birinchi beton quyish qurilishning faol bosqichi boshlanishi va ishlar to‘liq ko‘lamda yo‘lga qo‘yilishini anglatishini taʼkidladi.

Azim Axmedxadjayevning aytishicha, joriy yilda loyihaning atrof-muhitga taʼsirini baholash va xavfsizligini taʼminlash uchun zarur hujjatlarni tayyorlash ishlari yakunlanadi. Bu keyingi bosqichga o‘tish imkonini beradi. Prezident jarayonni cho‘zmaslik, aksincha, barcha muddatlarni tezlashtirishni topshirgan.

«Davlat rahbari birinchi beton quyish ishlarini 2026 yil mart oyida boshlashni buyurdi», — dedi Axmedxadjayev. Ushbu bosqich stansiya qurilishida faol amaliy ishlarga o‘tishni bildiradi.

“O‘zatom” rahbariga ko‘ra, prezident loyiha jamoasi oldiga muddatlar va ish sifati bo‘yicha yuqori talablar qo‘ygan. Shu bois har ikki haftada davlat rahbariga amalga oshirilgan ishlar va erishilgan natijalar haqida batafsil hisobot taqdim etiladi.

2024 yil 27 may kuni Toshkentda imzolangan shartnoma asosida Jizzax tumanida har biri 55 MVt quvvatga ega olti reaktordan iborat mamlakatdagi birinchi kichik quvvatli atom elektr stansiyasi quriladi.

General pudratchi sifatida “Atomstroyeksport” (Rosatomning injiniring bo‘limi) belgilangan bo‘lib, qurilish ishlariga mahalliy kompaniyalar ham jalb etiladi. 2025 yil iyun oyida Rossiya Iqtisodiy rivojlanish vazirligi maʼlum qilishicha, O‘zbekiston va Rossiya prezidentlari loyihani modernizatsiya qilishga kelishgan — u ikki blokli yirik quvvatli AES va ikki blokli kichik quvvatli stansiya qurilishini o‘z ichiga oladi.