Toshkent, O‘zbekiston (UzDaily.uz) — Meta kompaniyasining Osiyo va Tinch okeani mintaqasi bo‘yicha davlat siyosati masalalari bo‘yicha vitse-prezidenti Simon Milner boshchiligidagi delegatsiya IT Park Uzbekistan’ga tashrif buyurdi.

Tashrif doirasida mehmonlarga IT Park’ning faoliyati, unda yaratilgan ekotizim, istiqbolli loyihalar va investorlar uchun yaratilgan sharoitlar haqida batafsil taqdimot o‘tkazildi. Shundan so‘ng, delegatsiya UzSoc markazi bilan yaqindan tanishdi. Markazda axborot xavfsizligi, ijtimoiy tarmoqlardagi monitoring va boshqa yo‘nalishlar bo‘yicha olib borilayotgan ishlar bo‘yicha batafsil ma’lumot berildi.

Shuningdek, mehmonlar UZINFOCOM markaziga tashrif buyurib, u yerda raqamli infratuzilma, ma’lumotlar markazlari va zamonaviy texnologiyalar asosida ko‘rsatilayotgan xizmatlar bilan tanishdilar.

Tashrifning asosiy qismida delegatsiya Raqamli texnologiyalar vaziri Sherzod Shermatov bilan uchrashdi. Uchrashuv davomida ikki tomonlama hamkorlikning istiqbollari, kontent siyosati, yoshlar salohiyatini oshirish, sun’iy intellekt, raqamli iqtisodiyot va ijtimoiy tarmoqlarda xavfsizlikni ta’minlash masalalari muhokama qilindi.

Yakunda ushbu uchrashuv Meta kompaniyasi va vazirlik o‘rtasida ochiq muloqot va strategik hamkorlikni rivojlantirish yo‘lidagi muhim qadamlardan biri bo‘lib xizmat qilishi ta’kidlandi.