Marriott International O‘zbekistonda yana to‘rtta yangi mehmonxona ochishni rejalashtirmoqda

Toshkent, O‘zbekiston (UzDaily.uz) — Marriott International, Inc. kompaniyasi O‘zbekistondagi faoliyatini kengaytirish niyatida ekanini maʼlum qildi. Kompaniya 2028 yilning oxiriga qadar mamlakatda to‘rtta yangi mehmonxona ochishni rejalashtirgan. Marriott o‘z faoliyatini O‘zbekiston bozorida 2020 yilda Courtyard by Marriott Tashkent mehmonxonasini ochish orqali boshlagani haqida kompaniya matbuot xizmati xabar berdi.

Markaziy va Sharqiy Yevropa hamda DACH mintaqasi bo‘yicha rivojlanish bo‘yicha katta vitse-prezident Ivitsa Chachich ta’kidlashicha:

«O‘zbekiston turizm va ishbilarmonlik sayohatlari uchun Markaziy Osiyodagi eng istiqbolli yo‘nalishlardan biriga aylanmoqda. Biz bu bozorning ulkan salohiyatini ko‘rmoqdamiz va kengayish rejalarimiz mamlakatdagi yuqori sifatli mehmonxona xizmatlariga bo‘lgan ortib borayotgan talabni aks ettiradi. Biz O‘zbekistonda o‘z portfelimiz kengayishi orqali sayohatchilarga jahon darajasidagi sharoitlarni taklif etibgina qolmay, balki mintaqaning global xarita doirasida muhim turizm va investitsiya markaziga aylanishiga ham hissa qo‘shmoqdamiz».

Rejalashtirilgan loyihalar orasida — JW Marriott Hotel Tashkent, uning ochilishi 2025 yilning oxirigacha kutilmoqda.

287 ta xonali bu mehmonxona kompaniyaning mamlakatdagi ilk lyuks (oliy toifali) obyekti bo‘ladi. U JW Marriott‘ning tabiatdan ilhomlangan, uyg‘unlik va samimiy mehmondo‘stlikka asoslangan servis tamoyillarini namoyon etadi.

2028 yilda kompaniya The Ritz-Carlton, Tashkent mehmonxonasini ochishni rejalashtirmoqda. Unda 140 ta nozik tarzda bezatilgan xonalar va lyukslar, eksklyuziv The Ritz-Carlton Club xizmati hamda original konsepsiyaga ega uchta restoran faoliyat ko‘rsatadi.

Marriott shuningdek, o‘rta toifali (select-service) mehmonxonalar segmentini ham rivojlantirishni mo‘ljallamoqda. 2026 yilda Fairfield by Marriott Tashkent nomli zamonaviy 204 xonali mehmonxona ochilishi rejalashtirilgan bo‘lib, u brendga xos minimalistik dizayn bilan ajralib turadi.

2027 yilda esa Aloft Tashkent debyut qiladi — u 197 xonali bo‘lib, brend uslubidagi zamonaviy jamoat maskanlari bilan ajralib turadi.

Marriott‘ning O‘zbekistondagi faoliyatini kengaytirish rejalari kompaniyaning mamlakat turistik infratuzilmasini rivojlantirishga ko‘mak berish va uni Markaziy Osiyodagi xalqaro turizm hamda biznes markazlaridan biri sifatida mustahkamlashga bo‘lgan intilishini yaqqol namoyon etadi.

Marriott International, Inc. (Nasdaq: MAR) — bosh ofisi AQSHning Merilend shtatidagi Betesda shahrida joylashgan bo‘lib, dunyo bo‘ylab 143 davlat va hududda 30 dan ortiq brend ostida 9 600 dan ziyod obyektlar portfeliga ega. Kompaniya mehmonxonalar, appartamentlar, taymsherlar va boshqa turar joy obyektlarini boshqarish, franchayzing va litsenziyalash bilan shug‘ullanadi.