Markaziy bank onlayn kredit arizalarini kuniga bitta ariza bilan chekladi

Toshkent, O‘zbekiston (UzDaily.uz) — 22 apreldan O‘zbekistonda onlayn kreditlarni rasmiylashtirishning yangi tartibi kuchga kiradi, u qarz olishga cheklovlarni nazarda tutadi. Markaziy bank boshqaruvi qaroriga ko‘ra, fuqarolar bir sutka davomida faqat bitta onlayn kredit yoki mikrokreditni va faqat bitta kredit tashkilotida rasmiylashtirishi mumkin bo‘ladi.

Hujjatga muvofiq, ariza kelib tushganda moliyaviy tashkilot birinchi navbatda ariza beruvchining maʼlumotlarini kredit shartnomalarini tuzishi taqiqlangan shaxslar reyestrida tekshirishi shart.

Agar bir JSHSHR (PINFL) bo‘yicha bir vaqtning o‘zida bir nechta kredit tashkilotiga arizalar yuborilsa, kredit byurosi faqat birinchi arizani ko‘rib chiqadi. Qolgan murojaatlar dastlabki ariza bo‘yicha qaror qabul qilinguniga qadar vaqtincha inobatga olinmaydi.

Agar birinchi tashkilot tomonidan rad javobi berilsa, ko‘rib chiqish shu JSHSHIR bo‘yicha navbatdagi arizaga o‘tadi. Biroq agar kredit maʼqullanib, rasmiylashtirilsa, qolgan barcha arizalar avtomatik ravishda rad etiladi.

Qo‘shimcha ravishda belgilanishicha, qarz berilgandan so‘ng ushbu JSHSHR bo‘yicha yangi arizalar 24 soat davomida ko‘rib chiqilmaydi. Kutilmoqdaki, mazkur choralar firibgarlik xavflarini kamaytirish va fuqarolarning ortiqcha qarz yukini cheklashga xizmat qiladi.