Lyuksemburgda “O‘zbekiston – Yevropa Ittifoqi” hamkorlik kengashining 18-majlisi bo‘lib o‘tdi

Toshkent, O‘zbekiston (UzDaily.uz) — O‘zbekiston tashqi ishlar vaziri Baxtiyor Saidov bugun Lyuksemburgda bo‘lib o‘tgan “O‘zbekiston – Yevropa Ittifoqi” hamkorlik kengashining 18-yig‘ilishida ishtirok etdi.

"Bugun Lyuksemburgda biz Oʻzbekiston – Yevropa Ittifoqi hamkorlik kengashining 18-yigʻilishini muvaffaqiyatli oʻtkazdik. Uchrashuvda biz Oʻzbekiston va Yevropa Ittifoqi oʻrtasidagi koʻp tomonlama sheriklikni yanada chuqurlashtirishga sodiq ekanimizni yana bir bor tasdiqladik", — dedi tashqi ishlar vaziri oʻzining Telegram-kanalida.

Vazirning soʻzlariga koʻra, tomonlar siyosiy muloqotni mustahkamlash, savdo va sarmoyaviy hamkorlikni rivojlantirish, barqaror rivojlanish, mintaqaviy aloqalarni rivojlantirish yoʻllarini muhokama qilgan.

“Ushbu sessiya yakunlari hamkorligimizni kengaytirish va umumiy qadriyatlarga asoslangan yanada kuchli, istiqbolli sheriklikni barpo etishga yangi surʼat bagʻishlashiga ishonchimiz komil. Oʻzbekiston Yevropa Ittifoqi bilan oʻzaro hurmat, ishonch, tinchlik va farovonlik tarafdori boʻlgan jadal munosabatlarni rivojlantirish tarafdori”, - deya taʼkidladi Baxtiyor Saidov.