Litsenziyalash tartib-taomillari takomillashtiriladi

Toshkent, O‘zbekiston (UzDaily.uz) — Qonun (O‘RQ–1099-son, 27.11.2025 y.) bilan ayrim qonun hujjatlariga o‘zgartirish va qo‘shimchalar kiritildi.

Qonun bilan kiritilgan o‘zgartirishlarga ko‘ra, yong‘in xavfsizligi bilan bog‘liq ushbu faoliyat turlari litsenziyalanadigan faoliyat turlari ro‘yxatiga kiritildi:

yong‘inni avtomatik tarzda o‘chirish uskunalarini montaj qilish, sozlash, taʼmirlash hamda ularga texnik xizmat ko‘rsatish faoliyati;

yong‘in signalizatsiyasi qurilmalarini montaj qilish, sozlash, taʼmirlash hamda ularga texnik xizmat ko‘rsatish faoliyati.

Ilgari yong‘in xavfsizligi sohasidagi faoliyat turlari xabardor qilish tartibida amalga oshirilgan.

Shuningdek, kiritilgan qo‘shimchalarga ko‘ra, O‘zbekiston norezidenti bo‘lgan chet el yuridik shaxslari tomonidan O‘zbekistonda litsenziya va ruxsat etish xususiyatiga ega xujjatlarni olish uchun ariza berish hamda xabardor qilish ularning O‘zbekistondagi hisobga qo‘yilgan doimiy muassasasi orqali amalga oshiriladi.

Bunda tashqi iqtisodiy faoliyat hamda tranzit yuklarni tashish bilan bog‘lik 1 martalik harakatlarni bajarish uchun ruxsat etish xususiyatiga ega hujjatlarni rasmiylashtirish uchun ushbu shaxslarning O‘zbekistonda doimiy muassasalarini hisobga qo‘yishi talab etilmaydi.

Qonun rasmiy eʼlon qilingan kundan 3 oy o‘tgach kuchga kiradi.