Toshkent, O‘zbekiston (UzDaily.uz) — Joriy yilning 22-aprel kuni Investitsiyalar, sanoat va savdo vaziri Laziz Kudratov va Turkiyaning O‘zbekistondagi Favqulodda va muxtor elchisi Ufuk Ulutash o‘rtasida uchrashuv bo‘lib o‘tdi.

Uchrashuvda keyingi besh yilda O‘zbekiston bilan Turkiya o‘rtasidagi tovar ayirboshlash hajmi 1,4 barobar oshgani, mamlakatimizda turk kapitali ishtirokidagi korxonalar soni qariyb 2 mingtaga yetgani mamnuniyat bilan qayd etildi.

Shu bilan birga, mintaqaviy hamkorlik darajasi va ikki mamlakat iqtisodiyotlarining salohiyati savdo-iqtisodiy va sarmoyaviy hamkorlikni yanada rivojlantirish uchun foydalanilmayotgan ulkan imkoniyatlardan dalolat beradi.

Shulardan kelib chiqqan holda tomonlar, birinchi navbatda, ikki davlat o‘rtasida imzolangan imtiyozli savdo shartnomasi doirasida mahsulotlar ro‘yxatini kengaytirish bo‘yicha qo‘shma chora-tadbirlar ko‘rishga kelishib oldilar. Shuningdek, kelgusi yillarda oʻzaro savdo hajmini 5 milliard dollarga yetkazish maqsadida muvofiqlikni baholash sohasida kelishuv imzolash boʻyicha kelishuvga erishildi.

Mamlakatimizda amalga oshirilayotgan islohotlarni baholar ekan, elchi Turkiyaning pozitsiyasi o‘zgarishsiz qolayotganini ta’kidladi - qisqa vaqt ichida O‘zbekistonda investorlar uchun noyob sharoit va imkoniyatlar yaratildi.

Shu nuqtai nazardan, investitsiyalar sohasidagi hamkorlikni mustahkamlash va salohiyatli turk investorlarini mamlakatimizga jalb etish uchun barcha mavjud sa’y-harakatlarni safarbar qilishga to‘liq tayyorligi bildirildi.

Uchrashuv yakunlari boʻyicha mamlakatlarimiz oʻrtasidagi strategik sheriklikni yanada faollashtirish, birgalikda ish olib borish boʻyicha aniq yoʻnalishlar belgilab olindi va joriy yilda Oʻzbekistonga rejalashtirilgan oliy va yuqori darajadagi tashriflarga puxta tayyorgarlik koʻrish, yuzaga kelayotgan muammolarni tezkorlik bilan hal etish boʻyicha bevosita hamkorlik mexanizmi ishlab chiqildi.