Kobulda Afg‘oniston va Markaziy Osiyo davlatlari o‘rtasida birinchi maslahatlashuv dialogi o‘tkazildi

Toshkent, O‘zbekiston (UzDaily.uz) — Afg‘onistonda Markaziy Osiyo mamlakatlari va Afg‘oniston o‘rtasida birinchi maslahatlashuv dialogi bo‘lib o‘tdi. Ushbu tadbir mintaqaviy hamkorlikni mustahkamlashda muhim qadam sifatida baholanmoqda.

Yuqori darajadagi uchrashuv Kobul shahrida bo‘lib o‘tdi va Afg‘oniston Tashqi ishlar vazirligi tashabbusi bilan tashkil etildi.

Dialogda Markaziy Osiyoning besh davlati — O‘zbekiston, Qirg‘iziston, Turkmaniston, Tojikiston va Qozog‘iston vakillari ishtirok etdi. Uchrashuvning asosiy maqsadi diplomatik saʼy-harakatlarni muvofiqlashtirish, iqtisodiy hamkorlikni kengaytirish va mintaqaviy aloqalarni rivojlantirish uchun ko‘p tomonlama siyosiy mexanizm yaratishdan iborat bo‘ldi.

Afg‘oniston Tashqi ishlar vaziri Amir Xon Muttaqiy Afg‘oniston va mintaqa davlatlari o‘rtasidagi chuqur tarixiy, madaniy va geografik bog‘liqliklarni taʼkidlab, Imom Abu Hanifa va Imom Buxoriy kabi buyuk olimlarning Markaziy Osiyo umumiy intellektual merosiga qo‘shgan hissasini qayd etdi.

Tashqi ishlar vaziri shuningdek, zamonaviy geosiyosiy chaqiriqlarga, jumladan G‘arbiy Osiyodagi xavfsizlik masalalarini hisobga olgan holda, hamkorlikda javob berish zarurligini taʼkidladi.

«Birinchi maslahatlashuv dialogi mintaqada iqtisodiy o‘sish, xavfsizlik va barqaror rivojlanishga yo‘naltirilgan hamkorlikning yangi bosqichini boshlab berdi.

Davom etayotgan muloqot mintaqa uchun yana-da integratsiyalashgan va farovon kelajak yaratishga asos bo‘ladi», — deya qayd etdi Afg‘onistonning “Ariana News” agentligi.