Kannavaro O‘zbekiston terma jamoasida yiliga taxminan 4 million yevro maosh oladi — OAV

Toshkent, O‘zbekiston (UzDaily.uz) — 52 yoshli italiyalik mutaxassis Fabio Kannavaroning O‘zbekiston terma jamoasi bilan ishlashi uchun umumiy mukofot puli, shu jumladan uning murabbiylar shtabi aʼzolari mehnatiga to‘lanadigan haqlar bilan birga, yiliga taxminan 4 million yevroni tashkil etishi mumkin.

“Sport-Ekspress” nashrining xabar berishicha, dastlab Kannavaro Italiya yoki Yevropaning boshqa davlatlaridan klublar yoki terma jamoalardan taklif olishga umid qilgan. Shu bois uning Markaziy Osiyoga kelish borasida qaror qabul qilish jarayonida maʼlum vaqt tanaffus bo‘lgan. 2006 yilgi jahon chempioni va «Oltin to‘p» sohibi bilan Qozog‘iston ham qiziqish bildirgan.

Natijada mutaxassis o‘zbek tomoni taklif etgan shartlarni qabul qilib, bir yillik shartnoma imzoladi. Agar Kannavaro O‘zbekiston terma jamoasini 2026 yilgi jahon chempionatiga olib chiqsa, shartnomani uzaytirish yoki Yevropaga qaytish imkoniyati paydo bo‘ladi.

Kutilmoqdaki, uning murabbiylar shtabiga 44 yoshli Paolo Kannavaro — Fabioning ukasi kiritiladi. U avval Italiyaning S seriyasidagi «Pro Verchelli» klubida ishlagan bo‘lib, 2024 yil noyabr oyida jamoani tark etgan edi.