Toshkent, O‘zbekiston (UzDaily.uz) — AJ KAFIL-SUG‘URTA ustav kapitalini 60,701 mlrd so‘mdan 80,701 mlrd so‘mgacha oshiradi. Bu haqdagi maʼlumotlar Korporativ axborotning yagona portalida keltirilgan.

Sug‘urta kompaniyasi qiymati 1 000 so‘mdan bo‘lgan 20 mln dona qo‘shimcha oddiy nomli qog‘ozsiz aksiyalar chiqaradi. Emissiyaning umumiy qiymati 20 mlrd so‘mni tashkil etadi.

Aksiyalar yopiq obuna usulida yagona aksiyador — “KICHIK SANOAT MARKAZI” MCHJga joylashtiriladi. Joylashtirish davlat ro‘yxatidan o‘tkazilgan sanadan boshlab 365 kun ichida yakunlanishi rejalashtirilgan.

Joylashtirish narxi bir aksiya uchun 1 000 so‘m etib belgilangan, to‘lov faqat milliy valyutada, naqd pulsiz shaklda amalga oshiriladi. Aksiyalarni sotib olishda imtiyozli huquq berilmaydi, shuningdek, anderrayterlar jalb etilmaydi.

Joylashtirish birjadan tashqari bozorda to‘g‘ridan-to‘g‘ri bitimlar orqali amalga oshiriladi. Agar chiqarilgan aksiyalarning 60 foizidan kam qismi joylashtirilsa, emissiya amalga oshmagan deb hisoblanadi va sarflangan mablag‘lar investorga qaytariladi.