Toshkent, O‘zbekiston (UzDaily.uz) — O‘zbekistonning Jahon savdo tashkilotiga (JST) aʼzo bo‘lish bo‘yicha Ishchi guruhning o‘ninchi yig‘ilishi 2025 yil 13 iyun kuni Jenevada bo‘lib o‘tadi. Bu haqda O‘zbekiston Prezidentining JST masalalari bo‘yicha maxsus vakili Azizbek Urunov o‘zining LinkedIn sahifasida maʼlum qildi.

Urunov taʼkidlashicha, bo‘lajak yig‘ilishda asosiy eʼtibor ikki tomonlama muzokaralarni o‘tkazish, Ishchi guruh Hisoboti loyihasiga kiritilgan majburiyatlar loyihalarini muhokama qilish, shuningdek, qishloq xo‘jaligi masalalari bo‘yicha rasmiy bo‘lmagan uchrashuvni tashkil etishga qaratiladi. Bu tashabbus O‘zbekistonning tashkilotga to‘liq aʼzo bo‘lishi jarayonini jadallashtirishga qaratilgan.

Yangi savdo siyosatlari doirasida Prezident Shavkat Mirziyoyev rahbarligida mamlakatda amalga oshirilayotgan keng qamrovli bozor islohotlari ham yig‘ilishning alohida mavzusi bo‘ladi. Bu islohotlar iqtisodiyotni yana-da erkinlashtirish, bozor ochiqligi va raqobatbardoshligini oshirishni ko‘zda tutadi.

«Imkoniyatdan foydalanib, O‘zbekistonning JSTga qo‘shilish jarayonini doimiy qo‘llab-quvvatlayotgan tashkilot aʼzolariga samimiy minnatdorligimizni izhor etamiz», — deya taʼkidladi Urunov.

Maʼlumot uchun, hozirga qadar O‘zbekiston 33 ta davlat bilan ikki tomonlama muzokaralar o‘tkazgan va shulardan 24 ta davlat bilan bozorga kirish masalalari bo‘yicha kelishuvlarga erishilgan.