Javohir Sindarov Karuanani mag‘lub etib, Nomzodlar musobaqasida peshqadamga aylandi

Toshkent, O‘zbekiston (UzDaily.uz) — O‘zbekistonlik grossmeyster Javohir Sindarov Kiprda o‘tayotgan Nomzodlar musobaqaning to‘rtinchi turida amerikalik Fabiano Karuanani mag‘lub etib, musobaqada yakka peshqadamga aylandi.

O‘zaro uchrashuvga qadar har ikki shaxmatchi bir xil natijaga ega edi — 3 ta partiyadan 2,5 ochkodan to‘plagan. Sindarovning g‘alabasi unga 4 ta partiyadan 3,5 ochko jamg‘arish va turnir jadvalida yetakchilikni qo‘lga kiritish imkonini berdi.

Partiya 36-yurishda yakunlandi. Oq dona bilan o‘ynagan Sindarov o‘yin jarayonini ishonch bilan nazorat qildi, vaqt ustunligidan unumli foydalandi va turnirning asosiy favoritlaridan biri hisoblangan raqibini mag‘lub etishga erishdi. Hal qiluvchi vaziyat partiya o‘rtasida yuz berdi, Karuana muvaffaqiyatsiz yurishni amalga oshirganidan so‘ng o‘zbekistonlik shaxmatchi tashabbusni qo‘lga oldi va bosimni bosqichma-bosqich kuchaytirib, raqibiga hech qanday imkoniyat qoldirmadi.

Bu g‘alaba Sindarov uchun turnirdagi uchinchi g‘alaba bo‘lib, yakuniy muvaffaqiyat uchun jiddiy daʼvogarlikni anglatadi. 3 aprel kuni bo‘lib o‘tadigan beshinchi turda Sindarov amerikalik grossmeyster Hikaru Nakamuraga qarshi qora dona bilan bahs olib boradi.

2026 yilgi Nomzodlar musobaqasi 29 martdan 15 aprelgacha Kiprda o‘tkazilmoqda va unda dunyoning eng kuchli sakkiz nafar grossmeysteri, jumladan Nakamura, Karuana hamda debyutant Sindarov ishtirok etmoqda.

Ishtirokchilar ikki davra tizimida 500 ming yevro mukofot jamg‘armasi hamda amaldagi jahon chempioni — hindistonlik Dommaraju Gukeshga qarshi o‘ynash huquqi uchun kurashmoqda.

Musobaqa reglamentiga ko‘ra, klassik vaqt nazorati qo‘llaniladi va 40-yurishgacha durang taklif qilish taqiqlangan. G‘olib 48 ming yevro mukofotga ega bo‘ladi, har bir ishtirokchi esa to‘plagan har yarim ochko uchun 3500 yevrodan oladi.