Toshkent, O‘zbekiston (UzDaily.uz) — Mis folgasi ishlab chiqarishga ixtisoslashgan janubiy koreyalik SK Nexilis kompaniyasi energiya narxining yuqoriligi sababli O‘zbekistonda korxona ochish imkoniyatini o‘rganmoqda, deb xabar bermoqda Business Korea.

Nashr manbalariga ko‘ra, kompaniya Jonʼip shahrida joylashgan ishlab chiqarishni O‘zbekistonga ko‘chirishni rejalashtirmoqda. Ayni paytda SK Nexilis‘ning Malayziyada bir nechta zavodlari mavjud. Mis folgasi akkumulyatorlar ishlab chiqarishda qo‘llaniladi.

Maʼlumotlarga ko‘ra, elektr energiyasi xarajatlari folga ishlab chiqarishning tannarxida 15 foizgacha ulushga ega. Janubiy Koreyada 1 kilovatt soat narxi 0,13 dollarga yetsa, O‘zbekistonda bu ko‘rsatkich 0,08 dollarni tashkil etadi. Shuningdek, mamlakatda misning yirik zaxiralari va uni qazib olish tannarxi pastligi qayd etilmoqda.

«Biz xarajatlar raqobatbardoshligini taʼminlash maqsadida ishlab chiqarish quvvatlarini xorijga ko‘chirishni o‘z ichiga olgan turli variantlarni ko‘rib chiqmoqdamiz. Biroq yakuniy qaror hali qabul qilinmagan», — deya izoh berishdi SK Nexilis vakillari.