Janubiy Koreya elchisi Farg‘ona viloyatidagi mutaxassislar tayyorlash markaziga tashrif buyurdi

Toshkent, O‘zbekiston (UzDaily.uz) — Janubiy Koreya Respublikasining O‘zbekistondagi Favqulodda va muxtor elchisi Von Do Yon delegatsiya bilan birga Ulsan shahri ko‘magida tashkil etilgan Farg‘ona viloyatidagi malakali mutaxassislar tayyorlash markaziga tashrif buyurdi.

Elchi markazning ish jarayoni va taʼlim jarayoni bilan tanishib, tashkilotchilik va jihozlanish darajasi yuqoriligini alohida qayd etdi.

Von Do Yon mazkur loyiha O‘zbekiston va Janubiy Koreya o‘rtasidagi ikki tomonlama hamkorlikni mustahkamlashga xizmat qilayotganini taʼkidlab, uning yana-da rivojlanishi va kengayishiga umid bildirdi.

Tashrif doirasida markaz ishtirokchilari bilan ochiq muloqot o‘tkazilib, elchi yosh mutaxassislarni qiziqtirgan savollarga javob berdi va ularga kasbiy o‘sish hamda kelgusi faoliyatlarida omad tiladi.