IT Park Uzbekistan va KDB Bank Uzbekistan rezidentlarning bankni texnologik modernizatsiyalashdagi ishtirokini muhokama qildi

Toshkent, O‘zbekiston (UzDaily.uz) — Xizmatlar eksportini rivojlantirish bo‘yicha direktor Mahliyo Muksinova boshchiligidagi IT Park Uzbekistan vakillari axborot texnologiyalari departamenti direktori XaChon Chan rahbarligidagi “KDB Bank Uzbekistan” delegatsiyasi bilan uchrashuv o‘tkazdi.

Delegatsiya tarkibiga, shuningdek, raqamli bank departamenti rahbari Doston Fayziyev va raqamli xizmatlar departamenti bosh mutaxassisi Anora Fayzullayeva ham kirdi. Uchrashuvda tomonlar IT Park rezidentlarining “New Generation Project” (NGP) doirasida bank IT-infratuzilmasini modernizatsiyalash loyihalarida ishtirokini o‘rganish va hamkorlikning keyingi qadamlari bo‘yicha axborot almashishni davom ettirish to‘g‘risida kelishib oldilar.

KDB Bank Uzbekistan — bosh ofisi Seulda joylashgan Koreya moliya guruhining O‘zbekistondagi sho‘ba korxonasi hisoblanadi. Bank Toshkentda ikkita filial orqali faoliyat yuritadi, xodimlar soni 150 nafarga yaqin. Hozirda tashkilot “New Generation Project” loyihasi doirasida asosiy bank va operatsion tizimlarni yangilash bo‘yicha keng qamrovli dasturni amalga oshirmoqda.

Bank texnologik yangilanish va xalqaro standartlarga o‘tish rejalarini taqdim etdi. Tomonlar IT Park rezidentlarining NGP loyihasidagi ishtirokini, jumladan, asosiy bank tizimlari va yordamchi IT-yechimlarini modernizatsiyalashni muhokama qildilar. Koreyalik IT-pudratchilar bilan hamkorlik, tajriba almashish va keyinchalik yechimlarni integratsiyalash masalalari alohida ko‘rib chiqildi.

Bank tashabbuslarining “Initial Strategic Planning” (ISP) dasturi bilan qanday bog‘liqligi alohida muhokama qilindi. Asosiy bank tizimini yangilash tajribasiga ega kompaniyalarni jalb qilish rejalashtirilmoqda, bu esa O‘zbekistondagi IT Park rezidentlari bilan qo‘shma loyihalar uchun yangi imkoniyatlar yaratadi.

IT Park Uzbekistan uchun ushbu hamkorlik moliya sohasidagi yirik loyihaga kirish imkonini beradi, rezidentlar xizmatlari eksportini oshirishga ko‘maklashadi va mamlakatda xalqaro IT-yechimlarni joriy etishning asosiy maydoni sifatida parkning rolini mustahkamlaydi.