Istanbuldagi O‘zbekiston fuqarolariga ommaviy namoyishlardan yiroq yurish tavsiya etildi

Toshkent, O‘zbekiston (UzDaily.uz) — O‘zbekiston Respublikasi Tashqi ishlar vazirligi Istanbul shahridagi ommaviy norozilik namoyishlari munosabati bilan mamlakat fuqarolariga murojaat qildi.

TIV maʼlum qilishicha, Turkiya hukumati 11 sentyabrga qadar shaharning olti tumanida, jumladan O‘zbekiston Bosh konsulligi joylashgan Beshiktosh tumanida ham, ommaviy tadbirlar o‘tkazishni vaqtincha taqiqladi. Shuningdek, ayrim xorijiy messenjerlardan foydalanish cheklangan.

Fuqarolarga odamlar to‘planadigan joylardan uzoq turish, norozilik namoyishlari o‘tayotgan hududlarga yaqinlashmaslik va mahalliy qoidalar hamda tartiblarga qatʼiy rioya qilish tavsiya etilmoqda.

Favqulodda holatlarda fuqarolar O‘zbekistonning Istanbuldagi Bosh konsulligiga quyidagi telefon raqami orqali murojaat qilishlari mumkin: +90 (212) 909 08 04.

«Fuqarolarimizni hayot va sog‘liq uchun ehtimoliy xavflarning oldini olish maqsadida oshirilgan ehtiyotkorlikni saqlashga va xavfsizlik choralariga qatʼiy amal qilishga chaqiramiz», — deya taʼkidladi TIV.