Isroilda raketa hujumi oqibatida oʻzbekistonlik halok boʻldi

Toshkent, O‘zbekiston (UzDaily.uz) — O‘zbekiston Respublikasining Isroildagi elchixonasi 2026 yil 9 mart kuni Yehud shahridagi qurilish maydonida sodir etilgan raketa hujumi oqibatida O‘zbekistonda tug‘ilgan Rustam Gulomov halok bo‘lganini tasdiqladi.

Diplomatik vakolatxona maʼlumotiga ko‘ra, marhum 62 yoshda bo‘lgan. Rustam Gulomov O‘zbekistonda tug‘ilib o‘sgan, biroq 2017 yilda O‘zbekiston fuqaroligidan voz kechgan va so‘nggi 14 yil davomida Isroilda yashab kelgan. U shu mamlakat fuqaroligini ham olgan.

Elchixona marhumning oilasi va yaqinlariga chuqur hamdardlik bildirdi. 11 mart holatiga ko‘ra, O‘zbekiston fuqarolari orasida jabrlanganlar haqida xabarlar kelib tushmagan.

Mintaqada davom etayotgan keskinlik munosabati bilan elchixona Isroilda vaqtincha ishlayotgan yoki doimiy yashab kelayotgan barcha O‘zbekiston fuqarolariga murojaat qilib, hayot va sog‘liqni muhofaza qilish maqsadida xavf signallari va xavfsizlik qoidalariga qatʼiy rioya qilishga chaqirdi.