Ipoteka banki IFC uchun qo'shimcha aksiyalarni sotib olishning imtiyozli huquqi bilan chiqaradi

Toshkent, O‘zbekiston (UzDaily.uz) — 2026-yil 18-mart kuni o‘tkazilgan aksiyadorlarning navbatdan tashqari umumiy yig‘ilishi yakunlariga ko‘ra, “Ipoteka-bank“ 391,3 mlrd dona qo‘shimcha oddiy aksiyalarni joylashtirish to‘g‘risida qaror qabul qildi.

Joylashtirish bir dona aksiya uchun 1,1 so‘m narxda (joriy bozor narxi — 2,85 so'm) birjadan tashqari bozorda amalga oshiriladi. Emissiyaning umumiy hajmi 430,4 mlrd so‘mni tashkil etadi.

Asosiy investor sifatida Xalqaro moliya korporatsiyasi (IFC) ishtirok etadi — aksiyalar amaldagi aksiyadorlarning imtiyozli huquqi inobatga olingan holda yopiq obuna orqali xususiy joylashtirish shaklida taklif etiladi.

Joylashtirish muddati emissiya ro'yxatdan o'tkazilgan kundan boshlab 6 oygacha bo'ladi. Amaldagi aksiyadorlar o‘zlariga tegishli ulushga mutanosib ravishda imtiyozli huquqlaridan aksiyalar chiqarilishi e’lon qilingan kundan boshlab 10 kun ichida foydalanishlari mumkin.

IFC tomonidan to‘lov o‘zaro hisob-kitob yo‘li bilan amalga oshiriladi: bankning kredit bo‘yicha majburiyati kapitalga konvertatsiya qilinadi. Boshqa aksiyadorlar aksiyalarni so‘mda pul mablag‘lari orqali to‘lashlari mumkin.