Ipoteka Bank rekord foyda va mijozlar ishonchini oshirdi

Toshkent, O‘zbekiston (UzDaily.uz) — Xalqaro OTP Group tarkibiga kiruvchi Ipoteka Bank 2025 yil yakunlariga ko‘ra 1,763 trillion so‘m miqdorida sof foyda qayd etdi.

Bankning o‘z kapitali rentabelligi (ROE) 22,4 foizni tashkil etdi, aktivlar rentabelligi (ROA) esa 3,5 foizga yetdi. Ushbu ko‘rsatkichlar kapitaldan samarali foydalanish va bank biznes-modelining barqarorligini namoyon etadi.

Risk qiymati ko‘rsatkichi (Cost of Risk) 0,58 foizni tashkil qildi. Bu kredit portfelining yuqori sifati va risklarni boshqarish bo‘yicha ehtiyotkor siyosat yuritilayotganini ko‘rsatadi.

Bank mijozlarga xizmat ko‘rsatishni rivojlantirish borasida ham sezilarli natijalarga erishdi. Yil davomida operatsion jarayonlar va xizmat ko‘rsatish standartlari yangilandi. Bu o‘zgarishlar mijozlar loyalligi indeksi (NPS)ni 28 foizdan 66,8 foizgacha oshirishga imkon berdi, Mystery Shopping ko‘rsatkichi esa 66 foizdan 80 foizgacha yaxshilandi.

Mazkur o‘zgarishlar aniq o‘lchanadigan natijalarni ko‘rsatib, mijozlar uchun ham sezilarli bo‘ldi.

2025 yilda OTP Group ham kuchli moliyaviy natijalarni namoyish etdi. Guruhning sof foydasi 1,146 milliard vengr forintini (2,88 milliard yevro) tashkil etdi, kapital rentabelligi esa 21,6 foizga teng bo‘ldi. O‘sish kreditlash hajmlarining kengayishi va tranzaksiya faolligining ortishi hisobiga taʼminlandi: umumiy daromad yillik hisobda 11 foizga, operatsion foyda esa 10 foizga oshdi.

Faol kreditlar portfeli 15 foizga, depozitlar hajmi esa 11 foizga ko‘paydi. Aktivlar sifati barqarorligicha qoldi: Stage 3 ulushi 3,5 foizni tashkil etdi. Guruh kuchli kapitallashuvni saqlab qolmoqda (CET1 — 18,1 foiz) va asosiy bozorlarda strategik xaridlar imkoniyatlarini baholagan holda foydali organik o‘sishga eʼtibor qaratmoqda.