INNOPROM ko‘rgazmasida Belarus va O‘zbekiston 40 dan ortiq yetakchi kompaniyalar mahsulotlarini namoyish etdi

Toshkent, O‘zbekiston (UzDaily.uz) — O‘zbekiston Respublikasi Investitsiyalar, sanoat va savdo vaziri o‘rinbosari Xurram Teshabayev boshchiligidagi ISSV va mahalliy tadbirkorlar delegatsiyasi Belarus poytaxti Minsk shahrida bo‘lib o‘tgan “INNOPROM. Belarus” xalqaro sanoat ko‘rgazmasida ishtirok etdilar.

“Made in Uzbekistan” milliy stendida SPZ Bearings O‘zbekiston–Rossiya Qo‘shma Korxonasi, New Best Style, Premier Electrotech, Sulton Sharbat, Global Textile Group, Imzo, Artel, Toshkent Kimyo va Gold Step Invest kabi 40 dan ortiq yetakchi kompaniya mahsulotlari taqdim etildi. Kompaniyalar qurilish materiallari, elektrotexnika, kimyo, to‘qimachilik, zargarlik, charm-poyabzal va oziq-ovqat sanoatidagi O‘zbekiston salohiyatini namoyish etdilar.

O‘zbekistonning milliy pavilyoni Belarus va mintaqaning boshqa davlatlari ishbilarmon doiralari vakillari orasida katta qiziqish uyg‘otdi. Uchrashuvlar chog‘ida sanoat kooperatsiyasini kengaytirish, mahsulot yetkazib berish va qo‘shma ishlab chiqarishlarni rivojlantirish masalalari muhokama qilindi.

INNOPROM. Belarus — bu 20 ming m² dan ortiq ko‘rgazma maydoni, 300 dan ziyod kompaniyalar va 10 mingdan ortiq tashrif buyuruvchilarni birlashtirgan, “innovatsiyalar imkoniyatlar bilan uchrashadigan” platforma hisoblanadi.