IIB xodimi Buxoro viloyatida daryoga sakrab tushgan ayolni qutqarib qoldi

Toshkent, O‘zbekiston (UzDaily.uz) — Buxoro viloyati Vobkent tumani profilaktika inspektori, kapitan Amrillo Rasulov daryoga o‘zini tashlagan ayolni qutqarib qoldi. Bu haqda O‘zbekiston Ichki ishlar vazirligi Jamoat xavfsizligi departamenti maʼlum qildi.

Hodisa 29 yanvar kuni soat taxminan 16:30 da sodir bo‘lgan. Suv ichida ayolni ko‘rgan ichki ishlar organlari xodimi darhol muzdek suvli va kuchli oqimli daryoga sakrab tushib, uni sohilga olib chiqishga muvaffaq bo‘lgan. Bu paytda unga atrofda bo‘lgan fuqarolar ham yordam bergan.

Hodisa joyiga tez yordam brigadasi yetib kelib, jabrlanuvchini shifoxonaga olib ketgan.

Tibbiyot xodimlari maʼlumotiga ko‘ra, ayolning ahvoli qoniqarli deb baholanmoqda.

Maʼlum qilinishicha, ayol 20 yoshda bo‘lib, uning to‘rt nafar farzandi bor va u Buxoro viloyati G‘ijduvon tumanida istiqomat qiladi.

Ushbu holatga olib kelgan sabablar va vaziyatlar hozirda aniqlanmoqda.