Toshkent, O‘zbekiston (UzDaily.uz) — Islom hamkorlik tashkiloti (IHT) Bosh kotibiyati o‘z rasmiy saytida O‘zbekiston, Tojikiston va Qirg‘iziston Prezidentlari tomonidan uch davlat davlat chegaralarining tutash nuqtasi haqidagi shartnoma hamda «Xo‘jand deklaratsiyasi» imzolanganini qo‘llab-quvvatlashini maʼlum qildi.

Bosh kotibiyat O‘zbekiston Prezidenti Shavkat Mirziyoyev, Tojikiston Prezidenti Emomali Rahmon va Qirg‘iziston Prezidenti Sadir Japarov tomonidan imzolangan ushbu tarixiy kelishuvni mamnuniyat bilan qarshi olganini taʼkidladi. Ushbu shartnoma davlatlar o‘rtasidagi chegaralarni yakuniy demarkatsiya qilish yo‘lidagi muhim qadamdir. Hujjat 2025 yil 31 mart kuni Tojikistonning Xo‘jand shahrida o‘tkazilgan uch mamlakat yetakchilari sammiti davomida imzolandi.

IHT Bosh kotibi Husayn Ibrohim Toha uch davlat rahbarlari va xalqlarini ushbu muhim yutuq bilan tabrikladi. U taʼkidlashicha, ushbu kelishuv 30 yildan ortiq vaqt davomida hal qilinmagan chegara masalalarini tartibga solish bo‘yicha ko‘p yillik muzokaralarning natijasi bo‘ldi. Shuningdek, u mazkur shartnoma O‘zbekiston, Tojikiston va Qirg‘iziston o‘rtasidagi strategik munosabatlarni yangi bosqichga olib chiqishini qayd etdi.

IHT har doim mamlakatlar o‘rtasida do‘stona aloqalarni mustahkamlash, hamjihatlik va hamkorlikni rivojlantirish tarafdori ekanini bildirib kelgan. Shu munosabat bilan Bosh kotib ushbu kelishuv Markaziy Osiyoda xavfsizlik, barqarorlik, mintaqaviy hamkorlik va iqtisodiy integratsiyani mustahkamlashga xizmat qilishini ishonch bilan taʼkidladi.