HUMO va Korti Milliy toʻlov tizimlari strategik shartnoma imzoladi

Toshkent, O‘zbekiston (UzDaily.uz) — 2025-yil 13-oktyabrda Dushanbeda boshlangan xalqaro Plus Forum doirasida "Korti Milliy" (Tojikiston) va "HUMO" (O‘zbekiston) to‘lov tizimlari o‘rtasida strategik kelishuv imzolandi. Memorandumda tomonlarning hamkorlik aloqalarini o‘rnatish niyati belgilangan.

Kelishuvning asosiy jihati to‘lov infratuzilmalarining o‘zaro integratsiyasidan iborat: "HUMO" kartalari "Korti Milliy" tizimida, "Korti Milliy" kartalari esa – O‘zbekistonda ishlaydi. Bu har ikki mamlakat karta egalari uchun yangi imkoniyatlar yaratadi. Hujjatning maqsadi ikki yirik to‘lov tizimi o‘rtasidagi strategik hamkorlikni rivojlantirishdir.

Plus Forum odatda professional muloqot va tajriba almashish uchun nufuzli maydon vazifasini o‘taydi. Bu yilgi tadbirda "HUMO" kompaniyasini Aleksey Golenishchev "Banking va to‘lov sohasi kiberhavfsizligi va kiberbarqarorligi" mavzusidagi ma’ruzasi bilan taqdim etdi.

Bunday xalqaro anjumanlarda ishtirok etish kompaniyaga jahon moliya hamjamiyatida o‘z mavqei va ishbilarmonlik obro‘sini mustahkamlash imkonini beradi.

Ta’kidlash joizki, Tojikiston bilan o‘zaro aloqalarni yo‘lga qo‘yish O‘zbekiston Respublikasi uchun g‘oyat muhim va prezident Shavkat Mirziyoyevning yaqinda Tojikistonga qilgan amaliy tashrifi ham buning yorqin dalilidir.