HotelPro Hub — mehmonxona biznesining yangi o‘sish formati

Toshkent, O‘zbekiston (UzDaily.uz) — 2025-yil 29-oktabr kuni Turizm qo‘mitasi ko‘magida Toshkentda ilk bor “HotelPro Hub 2025” forumi bo‘lib o‘tdi. Bu yangi platforma mehmonxonalar, restoranlar, investorlar, professional pudratchilar hamda davlat va xususiy sektor vakillarini birlashtirdi.

Forum ochilishida Turizm qo‘mitasi raisining o‘rinbosari Sardor Niyozov ishtirokchilarni tabriklab, “HotelPro Hub” mehmondo‘stlik sohasidagi mutaxassislar uchun samarali muloqot maydoniga aylanishiga ishonch bildirdi.

“HotelPro” kompaniyasi asoschisi Dilshod Odilov o‘zining kirish so‘zida bu forum mehmonxona biznesi ehtiyojlarini yillar davomida chuqur o‘rganish natijasi ekanini ta’kidladi. Aynan shu tahlillar turli yo‘nalishdagi soha vakillarini bir maydonga to‘plash g‘oyasini keltirib chiqardi.

Darhaqiqat, “HotelPro Hub” nafaqat mehmonxonachilarni, balki potentsial investorlar va soha yetakchi yetkazib beruvchilarini — me’morlardan tortib, raqamlashtirish bilan shug‘ullanadigan kompaniyalargacha — birlashtirgan ilk platforma bo‘ldi.

Forum boshida ishtirokchilarga O‘zbekiston Milliy banki tomonidan turli hududlardagi turizm obyektlari haqida batafsil ma’lumot berildi. Milliy bank mamlakatda zamonaviy turizm infratuzilmasini yaratishda strategik hamkor sifatida ishtirok etmoqda.

Bugun mehmonxonalarga xizmat sifatini oshirib, xarajatlarni kamaytirishda nima yordam beradi? Eng avvalo — suv tejash va energiya samaradorligi! Shu mavzuda “R-Towers” loyihasi rahbari, xalqaro tajribaga ega bosh menejer Akmal Muratkulov o‘z taqdimotida batafsil tushuntirdi. Bu har qanday mehmonxona uchun muhim, ayniqsa spa-markazlar, basseynlar va restoranlarga ega yirik resort-mehmonxonalar uchun.

Spiker quyosh panellari, xonalar uchun kartali energiya tizimlari, yomg‘ir suvini yig‘ish kabi texnologiyalar orqali resurslarni tejash choralarini taqdim etdi. Bular nafaqat iqtisodiy, balki ekologik foyda keltiradi. Zamonaviy sayyohlar esa “yashil turizm” tamoyiliga amal qiladigan mehmonxonalarni tanlaydilar. Shu sababli, bunday texnologiyalarni joriy etish mehmonxona uchun raqobat ustunligi hisoblanadi.

Mehmonxonaning muvaffaqiyati loyihalash bosqichidanoq o‘ylab chiqilishi zarur. Buni o‘z nutqida “Tatalab.uz” asoschisi va O‘zbekiston yosh me’morlari assotsiatsiyasi rahbari Taxmina Turdialiyeva isbotlab berdi. Uning ta’kidlashicha, “yashil yondashuv” nafaqat ijobiy obro‘ keltiradi, balki iqtisodiy foyda ham beradi. Jahon banki ma’lumotlariga ko‘ra, energiya va suvni tejovchi texnologiyalarni joriy etish mehmonxona xarajatlarini 20–30 foizga kamaytiradi.

Bugungi kunda mehmonxona biznesi uchun raqamlashtirish ham zarur — bronlash tizimlaridan tortib, xonalarni tozalash jarayonigacha. “EXELY” kompaniyasi biznesni rivojlantirish menejeri Doniyor Xaydarov o‘z taqdimotida raqamli yechimlar resurs tejamkorligini va xizmat sifatining o‘sishini ta’minlashini qayd etdi. U onlayn bronlash, Channel Manager, PMS va xonalarni tozalash modullari kabi tizimlarning ahamiyatini tushuntirdi.

Forum davomida ko‘plab so‘zga chiqqanlar zamonaviy mehmonxona uchun raqamlashtirish va barqaror texnologiyalar muhim omil ekanini tasdiqladilar.

Turizm qo‘mitasi vakili Aziz Mirdjalilovning so‘zlariga ko‘ra, O‘zbekiston bugun ilgari kam tanilgan Markaziy Osiyo burchagidan dunyoning eng jozibador turistik yo‘nalishlaridan biriga aylandi. 2017-yildan buyon chet ellik sayyohlar soni 4 baravar oshdi, 2025-yil aprelidan boshlab esa har oyda 1 milliondan ortiq sayyoh mamlakatimizni ziyorat qilmoqda.

Turizm rivojlangani sayin ish o‘rinlari ko‘payadi, eksport ortadi va mamlakatning xalqaro tanilishi oshadi.

Bugun bu jarayonga “HotelPro Hub” ham o‘z hissasini qo‘shmoqda — bu yerda dunyodagi zamonaviy tendensiyalar, yangi hamkorlik imkoniyatlari haqida fikr almashildi. Ushbu kengaytirilgan platforma mamlakat mehmonxona tarmog‘ining yanada intensiv o‘sishiga xizmat qiladi, bu yerda zamonaviy standartlar va milliy mehmondo‘stlik muvaffaqiyatli uyg‘unlashgan.

“HotelPro Hub” asoschisi va Turizmni rivojlantirish assotsiatsiyasi raisi Dilshod Odilovning ta’kidlashicha, birinchi forum g‘oyaning to‘g‘riligini isbotladi — mehmonxona egalari va ularga xizmat ko‘rsatuvchilar birlashdi. Natijada, ishtirokchi kompaniyalar bazasi yaratiladi va u rasmiy vebsaytda muntazam yangilanib boradi. Shuningdek, tashkilotchilar hududiy tadbirlarni ham o‘tkazishni rejalashtirgan, bu esa viloyatlardagi mehmonxonalar uchun yangi imkoniyatlar ochadi. Demak, bu faqat boshlanishi xolos.