Hainan Xintanbo Investment kompaniyasi Andijon viloyatida to'rtta loyihani amalga oshirmoqda

Toshkent, O‘zbekiston (UzDaily.uz) — O‘zbekiston Respublikasi Investitsiyalar, sanoat va savdo vazirligi Andijon viloyati hokimligi va Xitoyning «Hainan Xintanbo Investment» kompaniyasi bilan hamkorlikda investitsiya loyihalarini birgalikda amalga oshirish to‘g‘risida Bitim imzoladilar.

Kelishuv doirasida Andijon viloyatida to‘rtta yirik loyihani amalga oshirish ko‘zda tutilgan bo‘lib, ular qatoriga Yangi Andijon (Bobur) massivida ko‘p funksiyali turar-joy majmuasini qurish, Xonobodda xalqaro logistika markazi («Quruq port») tashkil etish, «Sun’iy ko‘l» turistik majmuasini rivojlantirish, shuningdek, muhandislik-kommunikatsiya va yo‘l infratuzilmasini barpo etish kiradi.

«Hainan Xintanbo Investment» - yirik developerlik va infratuzilma loyihalarini amalga oshirishga ixtisoslashgan Xitoy investitsiya kompaniyasidir.

Investitsiyalarning umumiy hajmi 1,4 milliard dollardan oshadi. Loyihalarning amalga oshirilishi 2000 dan ortiq yangi ish o‘rinlarini yaratishga imkon beradi, bu esa Andijon viloyatining kompleks rivojlanishiga hamda O‘zbekiston-Xitoy investitsiyaviy hamkorligining kengayishiga xizmat qiladi.