Global beqarorlik sharoitida oltin narxi birinchi marta bir untsiya uchun 4800 dollardan oshdi

Toshkent, O‘zbekiston (UzDaily.uz) — Oltin narxlari (Oʻzbekistonning asosiy eksport mahsuloti) tarixiy maksimumlarni yangilashda davom etmoqda. Kotirovkalar tarixda ilk bor bir unsiya uchun $4 800 darajasidan oshdi.

Nyu-York tovar birjasida (COMEX) savdo qilinadigan qimmatbaho metall bo‘yicha fevral fyucherslari chorshanba kuni, 21-yanvar kuni, 1,82%ga qimmatlab, eng yuqori nuqtada $4 852,6 darajasiga yetdi.

So‘nggi ikki kun ichida qimmatbaho metall narxlari 5,6%ga sakradi. “Bloomberg“ qayd etishicha, Grenlandiya atrofidagi inqirozning keskinlashuvi va Yaponiya davlat qarzining keskin pasayishi himoya aktivlariga bo‘lgan talabni kuchaytirib, qimmatbaho metallar narxlarining yangi rekordlarga chiqishiga sabab bo‘ldi.

Dollar indeksi (DXY) Vashington tomonidan Grenlandiya bo‘yicha bildirilgan tahdidlar AQSh aktivlarida — valyutadan tortib, Uoll-strit aksiyalari va g‘aznachilik obligatsiyalarigacha — keng ko‘lamli sotuvlarni keltirib chiqarganidan so‘ng, qariyb bir oylik minimum darajada ochildi. Dollar kursining zaiflashuvi narxlari dollarda belgilangan metallarni xorijiy xaridorlar uchun nisbatan arzonlashtiradi.

Investitsiya uylari oltin narxi kamida yana $200 ga oshishi mumkinligini istisno qilmayapti. Xususan, “Citigroup“ tahlilchilari keyingi uch oy uchun oltin va kumush bo‘yicha prognozlarini mos ravishda $5 000 va $100 darajagacha oshirdi. “ANZ“ esa oltin narxi 2026 yilning birinchi yarmidayoq $5 000 dan yuqori bo‘lishini kutmoqda.