Geosiyosiy keskinlik fonida oltin narxi rekord darajaga chiqib, ilk bor unsiyasi 5100 dollardan oshdi

Toshkent, O‘zbekiston (UzDaily.uz) — Birja savdolarida oltin narxi navbatdagi tarixiy maksimumni yangilab, ilk marta unsiyasi 5100 dollar chegarasidan oshdi.

26 yanvar kuni ertalab qimmatbaho metall narxi unsiyasi uchun 5110,50 dollargacha yetdi. Shu bilan birga, kumush va platina bozorlarida ham o‘sish kuzatilib, ular ham o‘z tarixiy rekordlarini yangiladi.

2025 yil davomida oltin qiymati 64 foizga oshdi, bu esa 1979 yildan beri kuzatilgan eng yirik yillik o‘sish hisoblanadi.

Agentlik maʼlumotlariga ko‘ra, bunday jadal o‘sishning asosiy omillari sifatida oltinga himoyaviy aktiv sifatidagi yuqori talab, AQSHda pul-kredit siyosatining yumshatilishi, markaziy banklar tomonidan faol xaridlar va birja fondlariga rekord darajada mablag‘lar kirib kelayotgani qayd etilmoqda. 2026 yil boshidan beri oltin narxi allaqachon 18 foizdan ortiqqa oshgan.

Reuters taʼkidlashicha, tahlilchilar xalqaro beqarorlik, iqtisodiy noaniqlik hamda markaziy banklar va chakana investorlar tomonidan yuqori talab saqlanib qolishi tufayli 2026 yilda oltin narxi unsiyasi uchun 6000 dollargacha ko‘tarilishini kutmoqda.

Qimmatbaho metallar narxining o‘sishi jahon moliya bozorlaridagi beqarorlik davom etayotganini hamda oltin kapitalni himoya qilishda asosiy vosita sifatidagi ahamiyatini saqlab qolayotganini ko‘rsatmoqda.