Toshkent, O‘zbekiston (UzDaily.uz) — Qozog‘istonlik byudjet aviakompaniyasi FlyArystan Toshkent – Atirau – Toshkent yo‘nalishida yangi xalqaro reysni yo‘lga qo‘yayotganini eʼlon qildi. Mazkur yo‘nalish bo‘yicha ilk parvozlar 2025 yil 15 iyuldan boshlanadi, bu O‘zbekiston poytaxti bilan Qozog‘istonning g‘arbiy mintaqasi o‘rtasida to‘g‘ridan-to‘g‘ri havo qatnovini taʼminlaydi.

Iyul va avgust oylarida reyslar haftasiga uch marta — seshanba, payshanba va yakshanba kunlari amalga oshiriladi. Sentyabrdan boshlab jadval o‘zgaradi: parvozlar dushanba, chorshanba va juma kunlari amalga oshiriladi.

Chiptalar narxi bir tomon uchun 67 dollardan boshlanadi. Ushbu narxga salonda tasodifiy o‘rin va og‘irligi 5 kg gacha bo‘lgan, o‘lchami 56 × 23 × 36 sm dan oshmaydigan bir dona qo‘l yuki kiradi.