Finlyandiya Prezidenti Stubb rasmiy tashrif bilan O‘zbekistonga keladi

Toshkent, O‘zbekiston (UzDaily.uz) — Finlyandiya Respublikasi Prezidenti Aleksandr Stubb 2025 yil 30–31 oktyabr kunlari rasmiy tashrif bilan O‘zbekistonga keladi. Bu haqda Finlyandiya Prezidenti Devoni xabar berdi.

Prezident Stubb 31 oktyabr, juma kuni, Toshkent shahrida O‘zbekiston Respublikasi Prezidenti Shavkat Mirziyoyev bilan uchrashuv o‘tkazadi.

Muzokaralar chog‘ida Finlyandiya va O‘zbekiston o‘rtasidagi ikki tomonlama munosabatlar, geosiyosiy vaziyat va uning Yevropa hamda Markaziy Osiyo uchun mintaqaviy oqibatlari, Rossiyaning Ukrainaga qarshi noqonuniy urushi, shuningdek, ko‘p tomonlama tizimni qo‘llab-quvvatlash sohasidagi hamkorlik masalalari muhokama qilinadi.

Tashrif doirasida Prezident Stubb biznes-seminarda ishtirok etadi, Jahon iqtisodiyoti va diplomatiya universitetida maʼruza o‘qiydi hamda tashqi siyosat sohasidagi mutaxassislar bilan uchrashadi.

Prezident Stubb delegatsiyasi tarkibiga parlament aʼzosi, O‘zbekiston bilan do‘stlik guruhi raisi Ville Skinnari hamda Finlyandiya savdo va sanoat sohasi vakillari kiradi.

Avvalroq, Finlyandiyaning sobiq prezidenti Mauno Koyvisto 1992 yilda O‘zbekistonga rasmiy tashrif buyurgan edi.