Farg‘onada bolalar bog‘chalarida bolalarning ommaviy zaharlanishi nazoratga olindi — Bolalar huquqlari bo‘yicha vakil

Toshkent, O‘zbekiston (UzDaily.uz) — Farg‘ona viloyatidagi davlat maktabgacha taʼlim muassasalarida bolalarning ommaviy zaharlanishi bilan bog‘liq holat nazoratga olindi. Bu haqda Bolalar huquqlari bo‘yicha vakil xabar qildi.

Bolalar huquqlari bo‘yicha vakilning maʼlum qilishicha, 2026 yil 21 fevral kuni Farg‘ona shahridagi bolalar bog‘chalari tarbiyalanuvchilari tana haroratining ko‘tarilishi, holsizlik, ko‘ngil aynishi va ich ketishi alomatlari bilan viloyat yuqumli kasalliklar shifoxonasiga murojaat qilgan. Tibbiyot xodimlari bolalarda oziq-ovqat orqali kelib chiqqan o‘tkir diareya tashxisini qo‘ygan. Hozirgi vaqtda 62 nafar bola statsionar davolanishda qolmoqda, ularning ahvoli qoniqarli deb baholanmoqda.

Bolalar huquqlari bo‘yicha hududiy vakil vaziyatni joyida o‘rganish ishlarini olib bormoqda, bolalar va ularning ota-onalari bilan muloqot qilmoqda, tibbiy hujjatlarni o‘rganmoqda hamda ko‘rsatilayotgan yordam jarayonini monitoring qilmoqda. Shu bilan birga, viloyat sanitariya-epidemiologik nazorati boshqarmasi, maktabgacha va maktab taʼlimi boshqarmasi hamda boshqa tegishli tashkilotlar mutaxassislari maktabgacha taʼlim muassasalari oshxonalarida tekshiruvlar o‘tkazib, bolalar isteʼmol qilgan oziq-ovqat namunalari bo‘yicha laboratoriya tadqiqotlarini amalga oshirmoqda.

Zaharlanish holati yuz bergan bolalar muassasalari hududi Farg‘ona shahri prokuraturasi va shahar IIB xodimlarini o‘z ichiga olgan tergov-tezkor guruh tomonidan ko‘zdan kechirildi, zarur protsessual harakatlar amalga oshirildi. Ayni paytda shahar IIB tomonidan dastlabki tergovgacha tekshiruv ishlari olib borilmoqda.

Bolalar huquqlari bo‘yicha vakil bolalar manfaatlarini himoya qilish va holatga tezkor munosabat bildirishni taʼminlagan holda vaziyatni nazorat qilishda davom etmoqda.