Farg‘ona viloyatida Xitoyning Hunan Zhongvei kompaniyasining yangi investitsiya loyihalari muhokama qilindi

Toshkent, O‘zbekiston (UzDaily.uz) — Farg‘ona viloyatida xitoylik investorlar bilan faol muloqot va erishilgan kelishuvlar tufayli yirik investitsiya loyihalari barqaror o‘sib bormoqda.

Ushbu jarayonning asosiy ishtirokchilaridan biri Hunan Zhongvei Group So., Ltd. bo‘lib, u mintaqada bir qator tashabbuslarni amalga oshirmoqda.

Bugun viloyat hokimligida mazkur kompaniya vakillari bilan uchrashuv bo‘lib o‘tdi. Uchrashuv davomida kompaniya direktori Chen Mingbo hozirgi kunda amalga oshirilayotgan loyihalar haqida maʼlumot berib, 2026 yilda hayotga tatbiq etilishi rejalashtirilayotgan yangi investitsion tashabbuslar taqdimotini namoyish etdi.

Investor tomonidan Farg‘onada xalqaro savdo markazi, zamonaviy mehmonxona majmuasi hamda logistika markazlarini barpo etish bo‘yicha loyihalar ishlab chiqilgani maʼlum qilindi. Uchrashuvda ushbu loyihalarning iqtisodiy ahamiyati, istiqbollari va amalga oshirish mexanizmlari muhokama qilindi.

Shuningdek, investorning Xitoydagi hamkorlari tomonidan qurilish va turizm sohalaridagi loyihalarga investitsiya kiritishga qiziqish bildirilayotgani qayd etildi.

Viloyat hokimi Chen Mingbo boshchiligida viloyatda katta rejalar asosida barpo etilayotgan loyihalarni yuqori baholar ekan, ular nafaqat Farg‘ona iqtisodiyotiga salmoqli hissa qo‘shishi, balki mamlakatimizda ham ishonchli va salohiyatli investor sifatida kompaniya nufuzini yana-da oshirishini taʼkidladi.

Uchrashuv yakunida investor tomonidan ilgari surilgan yangi g‘oya va takliflar qo‘llab-quvvatlanishi, loyihalarni amalga oshirishda har tomonlama hamkorlik taʼminlanishi maʼlum qilindi.