Evgeniy Nastradin Beeline Uzbekistan kompaniyasiga rahbarlik qiladi

Toshkent, O‘zbekiston (UzDaily.uz) — Global raqamli operator VEON Ltd. (NASDAQ: VEON) tashkiliy salohiyatni kuchaytirish hamda shtab-kvartira va hududiy jamoalarning kelgusi o‘sishini ta’minlash maqsadida bir qator bo‘lajak boshqaruv tayinlovlarini e’lon qildi.

Yevgeniy Nastradin VEON Group executive-menejmenti tarkibidagi o‘rnini saqlab qolgan holda, korporativ tartib-taomillar yakunlangandan so‘ng Beeline Uzbekistan bosh ijrochi direktori lavozimiga tayinlanadi. Yevgeniy 2019-yildan buyon Beeline Kazakhstan bosh direktori lavozimida faoliyat yuritib, operatsion samaradorlik, barqaror o‘sish, moliyaviy xizmatlar, ko‘ngilochar yo‘nalishlar va digital-first brendlar bo‘yicha muvaffaqiyatli raqamli kengayish, shuningdek suveren sun’iy intellekt salohiyatini rivojlantirishda yuqori natijalarni namoyon etdi. 

“Men uchun kompaniya rivojlanishining shunday muhim bosqichida Beeline Uzbekistan’ga rahbarlik qilish katta sharaf. O‘zbekiston mintaqadagi eng jadal rivojlanayotgan raqamli bozorlardan biri bo‘lib, men bu yerda keyingi o‘sish uchun katta salohiyatni ko‘ryapman. Biz tarmoqni modernizatsiya qilish, mijozlar tajribasi sifatini oshirish va raqamli infratuzilmani rivojlantirish sohalaridagi kompaniya muvaffaqiyatlarini yanada mustahkamlaymiz,” — deya ta’kidladi Yevgeniy Nastradin.

2024-yil oktabr oyidan buyon Beeline Uzbekistan’ni muvaffaqiyatli boshqarib kelayotgan Andrey Pyataxin kompaniyadagi faoliyatini Operatsion direktor (COO) lavozimida ishlashni davom ettiradi. U VEON Group’da 25 yillik faoliyati davomida turli rahbarlik lavozimlarida ishlagan, jumladan, guruhning Gruziya, Armaniston va Qirg‘izistondagi sho‘ba korxonalariga rahbarlik qilgan.

“Mening Operatsion direktor lavozimiga o‘tishim strategik qaror bo‘lib, u nafaqat telekommunikatsiya sohasidagi 25 yillik tajribam va bilimlarimni qo‘llash, balki bor e’tiborimni operatsion samaradorlikni oshirishga qaratish imkonini beradi. Yangi bosh direktor O‘zbekistonning jadal rivojlanayotgan bozorida kompaniya biznesining o‘rnini kengaytirish bilan shug‘ullanadi. Markaziy Osiyoning ikki yetakchi iqtisodiyotidagi eng yaxshi boshqaruv amaliyotlari sinergiyasi nafaqat VEON’ning O‘zbekistondagi telekom-biznesi, balki fintexdan tortib telemeditsinagacha bo‘lgan yirik xizmatlar tizimining yangi rivojlanish bosqichiga asos bo‘ladi”, — deydi Andrey Pyataxin.

Jabbor Qayumov Beeline Kazakhstan bosh direktori etib tayinlanadi. U telekommunikatsiya sohasida qariyb 20 yillik xalqaro boshqaruv tajribasiga ega bo‘lib, VEON, Telia, Digicel va Axiata Group kabi yetakchi global kompaniyalarda rahbarlik lavozimlarida faoliyat yuritgan.

Ahmet Kayhan VEON Group’ga To‘lov tizimlari va raqamli aktivlar bo‘yicha direktor (Group Chief Payments & Digital Assets Officer) sifatida qo‘shiladi. U kompaniya moliyaviy xizmatlar va raqamli aktivlar yo‘nalishidagi strategik ambitsiyalarini jadallashtirayotgan bir paytda VEON shtab-kvartira jamoasida muhim rahbarlik lavozimlaridan birini egallaydi. Ahmet raqamli ekotizimlarni yaratish va kengaytirish, texnologiyalarga asoslangan moliyaviy ekotizimlarni rivojlantirish, shuningdek xalqaro kengayish va murakkab strategik bitimlarni amalga oshirish bo‘yicha 20 yildan ortiq tajribaga ega. U VEON’ga DgPays Group’dan qo‘shilmoqda, u yerda xalqaro operatsiyalar bo‘yicha rahbar sifatida global o‘sishni boshqargan, shuningdek BAAning yetakchi to‘lov xizmatlari provayderlaridan biri bo‘lgan NEOPAY kompaniyasida direktorlar kengashi a’zosi sifatida faoliyat yuritgan.

"Rahbariyat jamoamizni kuchaytirish raqamli innovatsiyalar va xizmatlarni kengaytirishga bo‘lgan uzluksiz e’tiborimizni aks ettiradi — bu bizning o‘sishimizning asosiy drayverlari," dedi VEON Group bosh direktori Kaan Terzioglu. "Biz boshqaruv jamoamizni chuqur tajribaga va global qarashga ega rahbarlar bilan mustahkamlayapmiz va yangilayapmiz. Hamkasblarimizni tayinlovlari bilan tabriklayman va raqamli ambitsiyalarimizni tezlashtirish yo‘lida birgalikda ishlashni intiqlik bilan kutaman." 

Barcha tayinlovlar tegishli korporativ va regulyator roziliklari olinganidan keyin, 2026 yil 1 apreldan kuchga kiradi. VEON Ahmetni kompaniyada, Yevgeniy, Jabbor va Andreyni esa VEONdagi yangi lavozimlarida kutib olishdan mamnun bo‘ladi.