Energetika vazirligi maʼlum qiladi: 20 yanvar holatiga ko‘ra elektr energiyasi ishlab chiqarish reja ko‘rsatkichlaridan 6 foizga yuqori

Toshkent, O‘zbekiston (UzDaily.uz) — O‘zbekistonda 20 yanvar kuni yuqori yuklamalar va sovuq ob-havoga qaramasdan, energetika kompaniyalari aholini elektr energiyasi bilan barqaror taʼminladi.

Energetika vazirligi maʼlumotlariga ko‘ra, ushbu kunda elektr stansiyalari tomonidan 272,8 million kVt·soat elektr energiyasi ishlab chiqarildi, bu rejaga nisbatan 6 foizga ko‘p bo‘lib, isteʼmolchilarga 249,2 million kVt·soat yetkazib berildi.

Tabiiy gaz isteʼmoli 145,5 million kub metrni tashkil etdi, shundan 1,5 million kub metri gaz to‘ldirish kompressor stansiyalari orqali avtotransport ehtiyojlari uchun yo‘naltirildi.

9 foizga rejadan yuqori holda 2 300 tonna suyultirilgan gaz ishlab chiqarildi, shuningdek, aholi va ijtimoiy soha obyektlariga 2 200 tonna yetkazib berildi, hududiy gaz to‘ldirish stansiyalarida esa 6,9 ming tonna zaxira shakllantirildi.

Birja savdolarida barqaror talab kuzatildi: bozorga 12 ming tonna benzin va 25 ming tonna dizel yoqilg‘isi chiqarildi, shundan 5 ming tonna benzin va 11 275 tonna dizel yoqilg‘isi sotildi. Suyultirilgan gaz 2,3 ming tonna hajmda birjaga qo‘yilib, butun hajm to‘liq realizatsiya qilindi.

Vazirlik tizimi korxonalarida qazib olish va ishlab chiqarish ishlari sutka davomida olib borilmoqda. Avariya brigadalari to‘liq shay holda bo‘lib, zarur uskunalar bilan taʼminlangan. 20 yanvar kuni elektr tarmoqlarida to‘rtta, gaz taʼminotida esa bitta avariya bartaraf etildi.

Qashqadaryo viloyati va Toshkent shahrining ayrim hududlarida elektr taʼminoti vaqtincha o‘chirildi, natijada bir necha ming isteʼmolchi maʼlum vaqt elektr energiyasiz qoldi, barcha o‘chirishlar qisqa muddatda bartaraf etildi. Surxondaryo viloyatining Qumqo‘rg‘on tumani va Qumqo‘rg‘on shahrida gaz sizib chiqishi sababli 4 400 ta xonadon va 70 ta ulgurji isteʼmolchiga resurs yetkazib berish vaqtincha to‘xtatildi, avariya soat 16:00 ga qadar bartaraf etildi.

Vazirlik isteʼmolchilar murojaatlariga tezkor javob qaytarish uchun kecha-kunduz faoliyat yuritayotgan “Call-markaz”lar ishlayotganini qayd etdi. 20 yanvar kuni 18 035 ta murojaat kelib tushib, barchasiga tushuntirishlar berildi.

Buxoro, Navoiy, Qarshin Yangiyo‘l va boshqa hududlarda elektr va gaz taʼminoti tarmoqlariga noqonuniy ulanish holatlari aniqlandi, jumladan, hisoblagichsiz uskunalardan foydalanish va o‘zboshimchalik bilan ulanishlar qayd etildi. Aniqlangan holatlar bo‘yicha umumiy zarar yuzlab million so‘mni tashkil etdi, materiallar huquqni muhofaza qiluvchi organlarga yuborildi.

Qish mavsumida baxtsiz hodisalarning oldini olish va uzluksiz ishlashni taʼminlash uchun 7596 dan ortiq xodimdan iborat 1479 ta maxsus guruh kunu tun faoliyat yuritmoqda.

Vazirlik fuqarolardan isitish moslamalari va gaz uskunalarini ishlatish qoidalariga qatʼiy rioya qilishni, ortiqcha energiya sarfini oldini olishni va foydalanilmaganda elektr jihozlarini o‘chirishni so‘radi.