Eldor Shomurodov va Timur Kapadze 2025 yilda O‘zbekistonning eng yaxshi futbolchisi va murabbiyi deb topildi

Toshkent, O‘zbekiston (UzDaily.uz) — O‘zbekistonda 2025 yilgi futbol mavsumi yakunlari sarhisob qilinib, mamlakatning eng yaxshi futbolchilari, murabbiylari va hakamlari aniqlandi.

«Yilning eng yaxshi futbolchisi» unvoni Eldor Shomurodovga berildi. Hujumchi O‘zbekiston milliy terma jamoasi bilan birga tarixda ilk bor jahon chempionatiga yo‘llanmani qo‘lga kiritdi, shuningdek, Turkiyaning «Istanbul Bashakshexir» klubi safida muvaffaqiyatli o‘yinlar namoyish etdi.

Qoraqalpog‘iston futbol assotsiatsiyasi mavsum yakunlariga ko‘ra «Yilning eng yaxshi hududiy futbol assotsiatsiyasi» deb eʼtirof etildi.

Ayollar oliy ligasining eng yaxshi to‘purari Diyoraxon Habibullayeva bo‘ldi. “Sevinch” klubi hujumchisi joriy mavsumda 31 ta gol urdi va chempionatning eng sermahsul o‘yinchisi sifatida maxsus mukofotga sazovor bo‘ldi.

«Yilning eng yaxshi yosh futbolchisi» unvoni Sadriddin Hasanovga nasib etdi. U 2025 yilda O‘zbekiston U-17 terma jamoasi bilan Osiyo kubogini qo‘lga kiritdi, musobaqaning eng yaxshi o‘yinchisi deb topildi va 17 yoshgacha bo‘lgan o‘smirlar o‘rtasidagi jahon chempionatida munosib o‘yin ko‘rsatdi.

Ayollar futbolida «Yilning eng yaxshi murabbiyi» sifatida Vladislav Xan eʼtirof etildi. Uning rahbarligida “Sevinch” jamoasi mamlakat chempioni bo‘ldi va Osiyo chempionlar ligasida O‘zbekistonni muvaffaqiyatli tarzda namoyon etmoqda.

Ayollar oliy ligasining eng yaxshi futbolchisi deb Nilufar Qudratova topildi. U “Sevinch” jamoasining asosiy o‘yinchilaridan biri bo‘lib, milliy musobaqalardagi g‘alabalarga katta hissa qo‘shdi.

«Yilning eng yaxshi murabbiyi» unvoni Timur Kapadzega berildi. Uning boshchiligida O‘zbekiston milliy terma jamoasi tarixda ilk bor jahon chempionatiga chiqib, mamlakat futboli uchun tarixiy natija qayd etdi.

Yusuf Ergashev «Bolalar futbolida yilning eng yaxshi murabbiyi» mukofotiga sazovor bo‘ldi. “Bunyodkor” akademiyasi murabbiyi hududiy terma jamoalar o‘rtasidagi O‘FA birinchiligi g‘olibi bo‘ldi hamda mamlakat o‘smirlar terma jamoalari uchun sakkiz nafar o‘yinchini tayyorladi.

Nasibabonu Toshmuxammedova «Yilning eng yaxshi ayol hakami» deb topildi. Superliga-2025 mavsumida u ilk bor bosh hakam sifatida maydonga tushdi, shuningdek, xalqaro musobaqalardagi o‘yinlarga xizmat qildi.

«Yilning eng yaxshi hakami» unvoni Ilgiz Tantashevga berildi. U klublar o‘rtasidagi jahon chempionatining muhim uchrashuvlarini boshqardi, xalqaro maydonda faol ish olib bordi va AQSH, Kanada hamda Meksikada o‘tkaziladigan 2026 yilgi jahon chempionati o‘yinlarini hakamlik qilishga nomzodlar ro‘yxatiga kiritildi.

Shuningdek, Diyora Habibullayeva «Yilning eng yaxshi futbolchi ayoli» deb eʼtirof etildi. U O‘zbekiston ayollar milliy terma jamoasining yetakchilaridan biri bo‘lib, butun mavsum davomida yuqori darajadagi o‘yin namoyon etib keldi.