Eldor Shomurodov va Abbosbek Fayzullayev Turkiyada «Istanbul Bashakshehir»ga g‘alaba keltirdi

Toshkent, O‘zbekiston (UzDaily.uz) — O‘zbekiston terma jamoasi yarim himoyachisi Abbosbek Fayzullayev Turkiya chempionatida «Istanbul Bashakshehir» tarkibidagi ilk golini urdi. Superliganing 13-turi doirasida turk klubi safarda “Kasimpasha”ni 3:1 hisobida mag‘lub etdi.

Jarohatidan to‘liq tiklanib, asosiy tarkibda maydonga tushgan Fayzullaev 26-daqiqada yuqori burchakka aniq jarima zarbasi bilan hisobni ochdi. Birinchi bo‘limga qo‘shib berilgan 45+4-daqiqada Amin Xarit jamoa ustunligini ikki barobarga oshirdi.

75-daqiqada «Istanbul Bashakshehir» Daviye Salkening maydondan chetlatilishi natijasida bir kishi kam bo‘lib qoldi va oradan to‘rt daqiqa o‘tib, Adam Arous “Kasimpasha”ning hisobdagi farqini qisqartirishga yordam berdi.

Uchrashuvga nuqta esa 90+7-daqiqada O‘zbekiston terma jamoasi hujumchisi Eldor Shomurodov tomonidan qo‘yildi. U Superligadagi o‘ninchi golini urdi va jamoasi g‘alabasini taʼminladi.