Davronova va Hukmova Osiyo chempionatida O'zbekistonga ikkita oltin medal keltirdi

Toshkent, O‘zbekiston (UzDaily.uz) — Xitoyning Tyanszin shahrida yopiq inshootlarda yengil atletika bo‘yicha Osiyo chempionati davom etmoqda. O‘zbekiston terma jamoasi medallar jamg‘armasini ikki oltin medal bilan to‘ldirdi.

Uch xatlab sakrash musobaqasida Sharifa Davronova 14,05 metr natija ko‘rsatib, ishonchli tarzda birinchi o‘rinni egalladi va oltin medalga sazovor bo‘ldi.

400 metrga yugurishda Jonbibi Hukmova 53,61 soniya natija bilan birinchi bo‘lib marraga yetib keldi va Osiyo chempionligini qo‘lga kiritdi.

O‘zbek sportchilari qizlarining muvaffaqiyatli chiqishi milliy terma jamoaning qitʼa chempionatidagi mavqeini mustahkamladi va yurtimiz yengil atletikasi tayyorgarlik darajasi yuqori ekanini tasdiqladi.