Chiqindi xizmatidan qarzdor 152 mingga yaqin abonentning elektr to‘loviga vaqtincha cheklov o‘rnatildi

Toshkent, O‘zbekiston (UzDaily.uz) — O‘zbekistonda maishiy chiqindilarni olib chiqish xizmatlari uchun qarzdorligi mavjud bo‘lgan 151 mingdan ortiq abonent uchun elektr energiyasi to‘lovini amalga oshirish imkoniyati vaqtincha cheklandi.

Bu cheklov to‘lov intizomiga rioya etish maqsadida, 1044-sonli Qonun talablari asosida joriy etilgan bo‘lib, bu haqda Chiqindilarni boshqarish va aylanma iqtisodiyotni rivojlantirish agentligi xabar qildi.

Agentlik maʼlumotlariga ko‘ra, 2026 yil 16 yanvar holatiga umumiy qarzdorlik miqdori 87,5 milliard so‘mni tashkil etgan 873 990 nafar abonentga «Hududiy elektr tarmoqlari» AJning “2100” qisqa raqami orqali SMS-xabarnomalar yuborilgan. Xabarnoma yuborilganidan keyingi besh kun ichida foydalanuvchilar 7,4 milliard so‘m qarzni to‘lab bergan. Qarzdorlik miqdori 14,8 milliard so‘mga teng bo‘lgan 151 202 nafar abonentga elektr energiyasi uchun to‘lov qilish bo‘yicha cheklov joriy etilgan. Qarz to‘liq qoplangan zahoti cheklov avtomatik tarzda bekor qilinadi.

Qarzdorlikni nazorat qilish tizimi avtomatlashtirilgan tarzda ishlaydi: qarzdorlar haqidagi maʼlumotlar har oyning 3-kunigacha «Toza makon» agentligining elektron billing tizimidan «Hududiy elektr tarmoqlari» AJ billing tizimiga uzatiladi.

Ushbu tartib 2025-yil 30-iyungacha bo‘lgan qarzdorliklarga tatbiq etilmaydi. 2025-yilning 1-iyulidan chiqindi xizmatlaridan shakllangan qarzdorliklar uchun joriy yilning 5-noyabridan boshlab qo‘llanilmoqda. 

Bundan tashqari, 2026 yil 1 yanvardan boshlab maishiy chiqindilarni olib chiqish xizmatlari uchun to‘lovlar faqat onlayn formatda va faqat amalda ko‘rsatilgan xizmatlar uchun qabul qilinadi.

Agentlik fuqarolarga chiqindilarni boshqarish va ko‘rsatilayotgan xizmatlar sifati bilan bog‘liq taklif yoki shikoyatlar mavjud bo‘lgan taqdirda, sutkaning istalgan vaqtida “1205” qisqa raqami orqali murojaat qilish mumkinligini eslatdi.