Centrum Air Dehli – Toshkent yo‘nalishi bo‘yicha aviaqatnovlarini yo‘lga qo‘yadi

Toshkent, O‘zbekiston (UzDaily.uz) — O‘zbekistonning Centrum Air aviakompaniyasi 2025 yil 2 oktyabrdan boshlab Dehli – Toshkent yo‘nalishi bo‘yicha to‘g‘ridan-to‘g‘ri muntazam reyslarni amalga oshirishini eʼlon qildi.

Kompaniya maʼlumotiga ko‘ra, dastlab parvozlar haftasiga ikki marta — seshanba va juma kunlari amalga oshiriladi. Bu esa Hindiston va O‘zbekiston o‘rtasida havo aloqalarini mustahkamlab, yo‘lovchilarga qulay narxlar, maʼqul jadval va barcha shart-sharoitlarga ega parvoz imkoniyatini yaratadi.

Barcha reyslar zamonaviy Centrum Air laynerlarida amalga oshiriladi, bu esa xavfsizlik va yuqori darajadagi xizmat sifatini, ham turistlar, ham biznes vakillari uchun kafolatlaydi.

Aviakompaniya parkida Airbus A320, A320neo, A321neo hamda keng fyuzelyajli A330-300 samolyotlari mavjud. Yaqin istiqbolda Centrum Air parkini kengaytirishni rejalashtirgan: 2025 yil yakuniga qadar 14 ta, 2026 yilga kelib esa 22 ta havo kemasiga yetishi kutilmoqda.

«Biz Dehli va Toshkent o‘rtasida to‘g‘ridan-to‘g‘ri havo qatnovini ochayotganimizdan faxrlanamiz. Bu yo‘nalish sayyohlar uchun qulaylik yaratishi bilan birga, O‘zbekistonning Hindistonni Markaziy Osiyo, Yevropa va Yaqin Sharq bilan bog‘laydigan mintaqaviy xab sifatidagi rolini mustahkamlaydi», — dedi aviakompaniya asoschisi va bosh direktori Abdulaziz Abduraxmonov.

To‘g‘ridan-to‘g‘ri reyslardan tashqari, Dehlidan yo‘lovchilar Toshkent orqali qulay tranzitlardan foydalanib, Olmaota, Moskva, Novosibirsk, Istanbul, Dubay, Tel-Aviv va Kopengagenga parvoz qilish imkoniyatiga ega bo‘ladilar. Bu esa Toshkentning Markaziy Osiyodagi transport markazi sifatidagi mavqeini yana-da kuchaytiradi.

So‘nggi yillarda O‘zbekiston turizm sohasini jadal rivojlantirib, mehmonlarni Buyuk Ipak yo‘li merosi, YUNESKO Butunjahon merosi ro‘yxatiga kiritilgan shaharlari — Samarqand, Buxoro va Xiva, shuningdek, kengayib borayotgan biznes va investitsiya imkoniyatlari bilan o‘ziga jalb etmoqda.

Turizm va mintaqaviy aloqalarni rivojlantirishga davlatning ustuvor eʼtibori tufayli mamlakat Yevropa, Osiyo va Yaqin Sharq o‘rtasidagi asosiy transport va turizm darvozalaridan biriga aylanmoqda.