Buxoro sudi mahalliy fuqaroni xorijdagi jang harakatlarida ishtirok etgani uchun 3,5 yilga ozodlikdan mahrum etdi

Toshkent, O‘zbekiston (UzDaily.uz) — Buxoro sudi mahalliy fuqaroni yollanma jangchi sifatida ishtirok etgani va xorijiy davlatning qurolli kuchlarida xizmat o‘tagani uchun aybdor deb topib, uni umumiy tartibdagi koloniyada jazo o‘tash sharti bilan uch yil olti oy muddatga ozodlikdan mahrum etishga hukm qildi.

Ish materiallariga ko‘ra, ushbu shaxs 2014 yildan boshlab Rossiyada mehnat faoliyati bilan shug‘ullangan, keyinchalik u yerda fuqarolik va harbiy bilet olgan.

2025 yilda u Rossiya Federatsiyasi Mudofaa vazirligi bilan kontrakt tuzib, Ukraina Zaporoje viloyatidagi jang harakatlari hududiga yuborilgan. Xizmat davomida u bel qismi, oyoq boldiri va qo‘l panjalaridan ko‘plab jarohatlar olgan.

O‘zbekistonga qaytgandan so‘ng tekshiruv jarayonida uning mobil telefonida jang harakatlarida ishtirok etganini tasdiqlovchi suratlar va hujjatlar aniqlangan.

Sud majlisida ayblanuvchi aybini to‘liq tan olgan va yumshatuvchi holatlarni inobatga olishni so‘rab, o‘zining oilaning yagona boquvchisi ekanini hamda voyaga yetmagan farzandi borligini bildirgan.

Himoya tomonining dalillariga qaramasdan, sud uning harakatlarini O‘zbekiston Respublikasi Jinoyat kodeksining 154-moddasi («Yollanma jangchilik») va 154-1-moddasi («Xorijiy davlatlarning harbiy, jazolovchi, huquqni muhofaza qiluvchi yoki boshqa organlarida xizmatga kirish») bo‘yicha kvalifikatsiya qilib, ayblov hukmini chiqardi.