Bryusselda O‘zbekiston ishtirokidagi yangi investitsiya va savdo loyihalari bo‘yicha muzokaralar bo‘lib o‘tdi

Toshkent, O‘zbekiston (UzDaily.uz) — 2025-yil 1-oktabr kuni O‘zbekiston Respublikasi Investitsiyalar, sanoat va savdo vaziri Laziz Kudratov Bryusselda Yevropa Komissiyasi, tegishli vazirlik va idoralar rahbariyati, shuningdek, Belgiya ishbilarmon doiralari vakillari bilan uchrashuvlar o‘tkazdi.

Uchrashuvlarda infratuzilma, energetika va aloqa sohalaridagi loyihalar, shuningdek, yirik ikki tomonlama tadbirlar va xalqaro iqtisodiy forumlarga tayyorgarlik masalalari muhokama qilindi. Yashil iqtisodiyot, barqaror logistika va yangi tarmoqlarga investitsiyalar jalb etish masalalariga alohida e’tibor qaratildi.

Shu yil noyabr oyida O‘zbekiston va Bryusselda savdo missiyalarini o‘tkazish bo‘yicha kelishuvga erishildi. Ular doirasida davlat tuzilmalari va biznes vakillari bilan amaliy hamkorlikni mustahkamlashga qaratilgan uchrashuvlar tashkil etiladi.

Kompaniyalar bilan uchrashuvlarda farmatsevtika, raqamli texnologiyalar, kapital bozorlar, transport va innovatsion tibbiyot sohalarida hamkorlik istiqbollari ko‘rib chiqildi.

Muzokaralar yakunlari Yevropa Ittifoqi va Belgiya tomonining O‘zbekiston bilan sheriklikni kengaytirish va qo‘shma loyihalarni amalga oshirishga tayyorligini ko‘rsatdi.