Toshkent, O‘zbekiston (UzDaily.uz) — Hukumat qarori bilan “Bo‘sh turgan davlat ko‘chmas mulk obyektlarini xatlovdan o‘tkazish va ulardan samarali foydalanishni tashkil etish chora-tadbirlari to‘g‘risida” gi nizom tasdiqlandi.

Nizom noturar bo‘lgan bo‘sh turgan davlat ko‘chmas mulk obyektlarini aniqlash va xatlovdan o‘tkazish, xatlov natijalarini rasmiylashtirish, bo‘sh turgan davlat ko‘chmas mulk obyektlaridan samarali foydalanish mezonlari va ulardan samarali foydalanishni tashkil etish tartibini belgilaydi.

Nizomga ko‘ra, Davlat aktivlarini boshqarish agentligi huzuridagi Davlat mulki obyektlaridan samarali foydalanish markazi va uning hududiy boshqarmalari "Davlat mulki" ATda bo‘sh turgan davlat ko‘chmas mulk obyektlarining hisobini yuritish sohasida quyidagilarni amalga oshiradi:

toifalarga ajratish bo‘yicha:

- bo‘sh turgan;

- meʼyorga asosan ortiqcha maydon aniqlangan;

- qurilishi tugallanmagan (1 yildan ortiq muddatda);

- samarali foydalanish choralari ko‘rilganligi bo‘yicha:

- rivojlantirish dasturlariga kiritilgan;

- ommaviy savdolar orqali sotilishi belgilangan;

- davlat-xususiy sheriklik dasturiga kiritilgan;

- ijaraga berish uchun ommaviy savdolarga chiqarilishi belgilangan.

Markaz aniqlangan bo‘sh turgan davlat ko‘chmas mulk obyektlari to‘g‘risidagi maʼlumotlarni xatlov yakunlangandan so‘ng 10 kun muddatda o‘zining rasmiy veb-saytida eʼlon qiladi.