Bekobodda 19 yoshli o‘zbekistonlik Ukraina hududidagi qurolli mojaroda ishtirok etgani uchun sudlandi

Toshkent, O‘zbekiston (UzDaily.uz) — Bekobod tuman jinoyat ishlari bo‘yicha sudida O‘zbekistonning 19 yoshli fuqarosi D. X.ga nisbatan ish ko‘rib chiqilib, u yollanmachilikda aybli deb topildi.

Ish materiallariga ko‘ra, 2025 yil may oyida yosh yigit ishlash maqsadida Rossiyaga yo‘l olgan. U yerda Telegram messenjeri orqali Akbar ismli shaxs bilan tanishib, u D. X.ga psixotrop moddalarni tashish bilan shug‘ullanishni taklif qilgan.

Avgust oyida D. X. navbatdagi narkotik yetkazib berish paytida huquqni muhofaza qiluvchi organlar tomonidan qo‘lga olingan. Shundan so‘ng unga nisbatan jinoyat ishi qo‘zg‘atilib, tergov hibsxonasiga joylashtirilgan. Izolyatorda unga harbiy shartnoma imzolash taklif qilinib, bu orqali umrbod ozodlikdan mahrum etilishdan qutulish mumkinligi aytilgan.

Shartnoma imzolangandan keyin D. X. Ukrainaning Zaporojye viloyatiga yuborilgan. U yerda harbiy tayyorgarlikdan o‘tib, tankda zaryadlovchi sifatida xizmat qilgan va maosh olgan. Keyinchalik unda appenditsit tashxisi qo‘yilib, harbiy gospitalga yuborilgan. U yerdan 9 kun o‘tgach qochib ketgan.

Moskvaga yetib kelgach, yosh yigit O‘zbekiston elchixonasiga murojaat qilib, «Vatanga qaytish sertifikati»ni olgan va 2025 yil noyabr oyida mamlakatga qaytgan.

Sudda aniqlanishicha, D. X. Instagram ijtimoiy tarmog‘ida sahifa yuritib, Rossiya harbiy formasida, jangovar qurol va texnika bilan tushgan suratlarni joylashtirgan, shuningdek arab va rus tillarida diniy nashidlar tarqatgan.

Bekobod tuman sudi uni O‘zbekiston Respublikasi Jinoyat kodeksining 154-moddasi 1-qismi (“Yollanmachilik”) bilan aybli deb topib, umumiy tartibdagi koloniyada 5 yil muddatga ozodlikdan mahrum etish jazosini tayinladi.