Baxtiyor Saidov AQSH vakillari bilan savdo va investitsiyaviy hamkorlikni kengaytirish masalalarini muhokama qildi

Toshkent, O‘zbekiston (UzDaily.uz) — O‘zbekiston Respublikasi tashqi ishlar vaziri Baxtiyor Saidov AQSHning savdo vakili Jeymison Grir hamda AQSH Eksport-import banki prezidenti Jon Yovanovich bilan samarali muzokaralar o‘tkazdi.

Uchrashuv davomida tomonlar ikki tomonlama savdo-iqtisodiy kun tartibining asosiy ustuvor yo‘nalishlarini muhokama qildilar. Jumladan, o‘zbek mahsulotlarining Amerika bozoriga chiqish imkoniyatlarini kengaytirish, investitsiyaviy hamkorlikni mustahkamlash va strategik ahamiyatga ega sohalarda qo‘shma loyihalarni qo‘llab-quvvatlash masalalariga alohida eʼtibor qaratildi.

Shuningdek, savdo jarayonlari samaradorligini oshirishga qaratilgan amaliy mexanizmlar va barqaror iqtisodiy o‘sish uchun zarur shart-sharoitlarni yaratish masalalari muhokama qilindi. Bu ikki davlatning savdo va investitsiyalar sohasidagi sheriklikni yana-da mustahkamlashga bo‘lgan intilishini aks ettiradi.

Uchrashuv O‘zbekiston va AQSH o‘rtasidagi iqtisodiy aloqalarni rivojlantirish bo‘yicha konstruktiv muloqot va saʼy-harakatlarni muvofiqlashtirish uchun navbatdagi samarali maydonga aylandi.